瘦身祥仔與「帝」無爭：攞3次都夠！

黎耀祥近年頻頻接拍廣告，包括大型超巿、電器、啤酒等，數量與廣告天王陳豪可謂不相伯仲。二人擔綱演出劇集《傳愛事務所》成為台慶劇，相信又會掀起「爭帝戰」。不過貴為三屆視帝的祥仔坦言現時心境與世無爭：「攞咗3次夠啦！我真係冇所謂，又唔想有咁大壓力。某程度攞獎啲角色都係喊苦喊忽，我都唔想拍啲太沉重嘅劇，希望拍啲輕鬆、開心啲嘅」。提到陳豪的大陸劇酬30萬一集，祥仔坦言不會羨慕，他笑言：「我唔恨，不過一定會叫佢請食飯，之前鄭嘉穎都請咗。」

再見baby fat

日前祥仔以多個有型look拍攝纖體美容廣告硬照，狀態甚佳的他連之前拍劇累積的大眼袋亦消失。向來肥面不肥身的他，兩邊臉頰的肉更不見了，祥仔坦言做了四次療程後的效果。提到佘詩曼亦是此公司的女代言人，祥仔笑言與阿佘拍住上：「每次拍廣告我都自己試一試，個身未得閒做住，每次做臉同眼袋，都要兩個鐘。我哋呢啲靠塊面搵食，梗係要搞搞，我仲係有baby fat，肥面唔肥身，依家變咗瓜子臉好開心。」

《神》劇收視升

有指祥仔與陳豪齊齊打壓「有線幫」的黃翠如、洪永城，祥仔昨日對此表示：「我訪問時都冇咁講，寫出嚟好似我好唔妥咁，完全曲解！我覺得黃翠如做戲好自然，洪永城又有觀眾緣，畀機會佢哋絕對係合理嘅安排，絕對唔關乜嘢幫派事。」

另外，祥仔主演的劇集《神探高倫布》上周大結局，收視升了兩點，平均有24點，最高收視亦有28點。此劇亦收到16宗投訴，包括劇情難以理解、不吸引、演員演技欠佳。

文：影視組