吳千語遇「新歡」 失魂差錯腳

【蔡志豪澳門直擊】林峯女友吳千語前晚行騷時與緋聞男友Jimmy同場,男方緊張得耷頭玩手機,女方則扮看不到對方,但行騷時表現失魂一度差錯腳!另外,千語昨日到澳門玩SKYWALK,竟直言林峯尚未入圍其「屋企人」一欄。

無綫小生林峯與19歲女友吳千語一直打得火熱,但最近有傳千語與雜誌編輯Jimmy密會,令男方大動肝火,千語急急在微博澄清,解釋只是一班朋友的聚會。千語前晚為時裝品牌行騷,適逢Jimmy亦有到場,但他不時頭耷耷玩手機,只抬頭望千語一眼,千語亦特地不走往他附近及避開眼神接觸,更表現失魂差錯腳,未大合照又行錯返後台。

認雙方成日都見

事後千語表示因台面不夠光才差錯腳,又稱沒為意Jimmy是否在場:「冇特登避,係朋友成日都見。(同阿峯講?)我哋每日都知對方行程,同邊個一齊,阿峯都識佢,對我好放心!(你好激動澄清?)唔係,佢(Jimmy)唔係呢行,見佢咁畀人寫有啲無奈。(減少見面?)大家都有另一半,冇咩好誤會,講到我有異性就有嘢咁!」

半天吊感覺牙煙

另外,昨日千語與化妝師Rick Chin到澳門338米高的旅遊塔,為now TV觀星台節目《CHIN與千尋》拍外景,他們玩SKYWALK時大風又下雨,仍要危坐塔邊雙腳離地,相當牙煙,期間被安全帶「勒緊褲頭」的Rick整個身體從後緊貼千語,動作「親密」。千語表示事前簽下「免責書」,但只需簽自己名字,問到他日會否將林峯列入受益人?她說:「會寫屋企人。(男友?)佢未係屬於屋企人個圈裏面。(叫佢寫你?)唔需要用咁嘅方法去證明(愛),有咁諗法好恐怖。」

另外,張栢芝被指因腰傷而退出跳水訓練,卻拍到與兩子在酒店游泳,好友Rick代澄清:「佢唔係腰傷,係有啲痛,之前醫生驗咗佢十年前個舊患,唔可以再傷。(佢仲生?)諗住o架!(同邊個?)咁一定唔係我。(有新戀情?)未有,我都想佢快啲有好人家。」

採訪:名人組、影視組