洪天明囝囝百日識蜈蚣彈

洪天明與周家蔚昨晚為囝囝TJ擺百日宴,不少圈中好友都有到場恭賀,天明一家三口以淺藍色襯到絕的「溫馨裝」示人,不少Uncle都指TJ發育好,苗僑偉更指BB識「蜈蚣彈」,深得爺爺洪金寶的遺傳。

榮升父母的洪天明與周家蔚昨晚為囝囝洪大仁(TJ)舉行百日宴,在上環一間酒樓筵開十席,現場星光熠熠,包括苗僑偉夫婦、錢嘉樂夫婦、陳小春夫婦、方中信夫婦、佘詩曼、謝天華、方力申等等,而爺爺洪金寶更一早到場打點。天明一家三口可謂襯到絕,以淺藍及白色打扮示人,天明說:「原本只係一家人食飯,約吓約吓好多朋友,十圍應該坐唔晒。」

周家蔚收身辛苦

家蔚笑言本來自製的cup cake招呼賓客,但卻老公「潑冷水」嘲獻醜,說畢兩公婆你一言我一語,公然耍花槍,而天明滿意老婆收身成果,他說:「OK啦!佢收身收得好辛苦,因為佢好鍾意食嘢,要戒口。(你今晚盡興飲多杯?)飲少少啦,媽媽要湊BB,冇得飲,我就負責應酬。」他又透露留港三個月拍新片,現時要積極keep fit,旁邊的家蔚笑說:「希望我練到三舊腹肌、天明練到六舊!」天明聞言即笑謂:「三舊點練呀?」

洪金寶在子女洪天祥與洪煦榆陪同下受訪,全程笑得開懷,問到送甚麼禮物給孫仔?他笑言:「遲啲乜都係佢o架啦,(催天明再生?)唔會,佢哋揸主意啦,(TJ唔夠100日識轉身,有你遺傳喎?)個個BB都識轉身o架啦,有幾出奇,(叫佢學功夫?)唔會。」

苗僑偉讚有遺傳

與天明認識多時的方力申,笑稱小時候已看對方做戲,而阮兆祥指已送上BB櫈給TJ,他說:「BB發育得好快,(已經識轉身!)佢將來嘅體力相信好似爸爸同爺爺咁。」苗僑偉則大讚TJ識「蜈蚣彈」,有爺爺的遺傳。而阿佘就封了大利是給TJ。

文:影視組