蔡少芬收視低覺難過

早前誕下細女張信兒的蔡少芬(Ada,圖)昨日到柴灣拍廣告,稍為修身的她已消瘦了但仍要減八磅:「個女依傢十二磅,我餵人奶,佢不停咁食,食飽就屙,搞到我好攰,但見佢肥嘟嘟、節瓜肉都覺得值得。」Ada再強調封肚「收爐」。

Ada主演的劇集《金枝慾孽貳》收視低迷,過去的周二及周三分別錄得20及21點新低,她承認有點難過:「希望觀眾畀啲耐性、心機去睇,睇緊嗰陣個女喊都係塞個公仔畀佢,個女以為化晒大戲妝嘅關禮傑係我囉。」

鄧萃雯插零劇本,Ada指有分場、故事大綱,都知故事講甚麼只是未有對白,大抵與戚其義合作慣沒有太大壓力,沒有「設定」做出來亦自然一點。是否雯女與阿戚未夠默契有誤會?Ada說:「希望唔好有啦,我都想聯絡雯女諗下有乜辦法谷宣傳。」對於與阿戚合作的劇集收視都差?Ada認為要講天時地利人和,之前所拍的《珠光寶氣》在大陸幫她很多,收視雖然重要,亦要享受拍攝過程,能合作是榮幸,再合作是因為有質素!