王梓軒唔怕變肥 孖范振鋒狂擦

王梓軒加入無綫新一輯《夜宵磨》，與范振鋒齊齊介紹消夜好店，Jonathan說：「我冇食消夜習慣，為咗唱歌護聲，我唔飲凍嘢亦好少食甜，但為咗呢個節目我破例。（怕變肥仔？）唔怕，我係瘦底又有做運動，加上有阿范教路，識得幾時應該真食，幾時應該畀表情，所以拍咗幾集都冇肥到！」

兩星期肥十磅

范振鋒笑言經驗之談代價不輕，他說：「拍呢個節目冇得唔肥，我拍第一輯時好低能，食飽飯至去拍，試過拍日式串燒，因為要拍多啲shot，食咗廿幾串，結果兩個禮拜我肥咗十磅。（老婆李思欣投訴？）冇喎，唉！我夠想八舊腹肌啦！（老婆想你肥啲，唔怕人搶走？）唔知呢，但佢試過見我唔使開工都梳頭，問我搞乜？乜唔開工唔使梳頭o架咩？」

二人拍節目時大飽口福。

王梓軒與范振鋒齊去尋找美食，幸好二人都沒有因此變肥仔。

談到飲食習慣，Jonathan說：「我鍾意早餐嘅清新感覺，有時晏晝我都整件格仔餅或者乳酪，又飽肚又冇罪惡感！今日咁多味菜，我最鍾意煙午餐肉雞蛋墨西哥卷，鍾意佢有早餐感覺。」范振鋒說：「我就鍾意拼盤Sharing Board，鍾意落完單即刻有得食，雞翼、火腿、芝士，冇人唔鍾意啩？」

採訪：影視組

攝影：吳文聰

場地：Backstage Live Restaurant

王梓軒化妝：Ranson @ Beauty Tech

范振鋒髮型：Dick @ Stage