Kelly怕惹小龍包急隔離

「潮媽」陳慧琳昨日出席活動,透露大仔劉昇前晚發高燒,嚇得她立即撲藥,幸好昨日已退燒;她並言劉昇發燒後即隔開一對寶貝仔,以免傳染給一歲大的細仔。

陳慧琳(Kelly)昨日出席品牌活動,以一襲背心通窿裙亮相的Kelly身材fit爆,完全不似兩子之母!提到下月便是母親節,Kelly直言未有任何計劃,亦不打算外遊,甚為憂心的她說:「因為大仔劉昇(蝦餃仔)尋晚(即前晚)發高燒,嚇到我即刻去撲藥。(睇醫生?)搵唔到醫生,好彩撲到藥,但最後唔使食,今日已經退咗燒。」問到蝦餃仔有否上學?她說:「冇,起碼抖兩日先!(喺學校惹?)係呀,啱啱咳先好番,又有少少鼻水。」而其細仔劉琛(小龍包)就剛打針,故要隔開二人:「細仔啱啱打完一歲針,要隔開佢兩個,流鼻水就麻煩,但佢兩個成日都交換口水,大仔飲嘢又畀細仔飲,好難避免!」

拒帶寶貝仔睇騷

6月將為好友雷頌德擔任作品展嘉賓的Kelly,坦言屆時不打算帶一對寶貝仔欣賞:「怕佢哋驚嘈,大仔之前都去過紅館,如果我帶佢哋去,到時佢哋喊我個心離一離,會唔記得晒啲嘢。(囝囝知你做歌手?)佢麻麻哋明,唔係好知。(喺電視見到你覺奇怪?)有時佢都會喺電視見到自己或者爸爸,我哋拍佢嗰啲video都係放喺電視畀佢哋睇,佢覺得個個都得(指上電視),所以冇乜嘢,未有咩反應。」

破冰上無綫唱歌

Kelly謂蝦餃仔有功課時會一齊做,最近蝦餃仔學習交通工具:「我都有帶佢搭,好似飛機、電車都搭過晒。(要喬裝?)唔使,啲人冇嘢。」身為「四大」歌手的Kelly並言今日會到無綫錄節目:「『四大』歌手終於可以上去唱歌,到時我會唱一首,好多年冇唱,起碼生完細仔都冇上過去,係破冰後第一次上去唱歌。(唔畀亂講嘢?)我冇咩講,亦唔會亂講嘢。」

文:音樂組