G.E.M. 珍惜所宥
「小巨肺」G.E.M.（鄧紫棋）一連五場「G.E.M.X.X.X.LIVE」前晚結束，除了嫲嫲及雙親到場支持，妹妹更上台混入合唱團。另一「家庭成員」林宥嘉（Yoga）則靜雞雞低調撐場。本報率先披露，Yoga為免洩露行蹤，前日傍晚先到後台跟女友見面，其後更以口罩格仔衫look掩人耳目，低調混入觀眾堆進場。
張敬軒教擦鞋
雖然有粉絲在微博踢爆Yoga蹤影，但仍無損他雅興，個唱過後更在微博向G.E.M.施冧功，他寫道：「你是這片夜空最耀眼的星星。」G.E.M.亦立即轉載回應「會更珍惜眼前的一切」，二人隔空傳情，非常甜蜜。
前晚嘉賓張敬軒與G.E.M.合唱後，即將她與「巨肺」甄妮的是非擺上枱。軒仔說：「點解你會請我上嚟？係咪因為我做過甄妮嘅嘉賓？吖！係甄妮姐姐至啱。」被殺個措手不及的G.E.M.笑到彎晒腰地說：「我有邀請佢嚟睇，佢有覆我已經好好，佢話喺美國嚟唔到。」軒仔說：「我相信係誤會，但有時候係要擦吓鞋嘅。」他更即場施展擦鞋伎倆，狂讚G.E.M.媽是妙齡少女。
完騷後，G.E.M.直言要學識擦鞋，問到Yoga為何低調現身？她自豪地說：「乜你哋見唔到佢咩？（完騷慶祝？）唔啦，要上廣州工作。（佢有冇叫你小心疫情？）唔講喇。」另外，G.E.M.的巡唱包括美國站，問擔不擔心恐怖襲擊？她指一切仍在安排中。
文：音樂組