謝安琪唔安樂
謝安琪（Kay）、鍾嘉欣、林欣彤及許廷鏗等昨晚為大革新的《勁歌金曲》錄影，該節目將改往周六凌晨播放。眾星聞悉陳僖儀（Sita）死訊後表現憂傷，Kay曾在Sita入行前的歌唱比賽擔任評判，被對方視為伯樂的她直言「唔安樂」。Kay哽咽說：「Sita喺比賽後有機會錄音，佢入行後特登多謝我。我好鍾意佢，佢係一個好有禮貌、好開心嘅女仔，上個月亞洲音樂節先至為佢打氣。睇到新聞好唔安樂，成日行嚟行去做唔到嘢。」
林欣彤與Sita同用一個化妝師，昨晚她表現呆滯，未能接受到Sita死訊：「我個化妝師成日都有提起Sita，我哋成日會喺後台傾偈講笑，之前喺《勁歌》仲同佢一齊合唱，畀佢獨特聲線吸引，我到依家都反應唔到。」