只花去12天拍攝的《低俗喜劇》，令杜汶澤名利雙收，更換來金像獎「最佳男主角」的一紙通行證。能與偶像梁朝偉「齊名」，令阿澤打從心底裏覺得榮幸，但同時卻戥落選的郭富城相當不值：「如果佢入圍，我一定輸硬！」
因被內地網民怒罵「連普通話也說不好，妄想來染指內地電影」，促使導演彭浩翔及阿澤決定「爭氣」，開拍一套地道港產片。《低》片投資850萬、拍攝期不足兩周，為阿澤換來無比的信心及快樂，更憑此片在剛過去的金馬獎及周六將舉行的金像獎角逐影帝。金像獎面對猛人梁朝偉（《聽風者》）、梁家輝（《寒戰》）、張家輝（《大追捕》）及劉青雲（《消失的子彈》），論資排輩阿澤似乎「越級挑戰」，難怪他直言贏輸其次，唯一覺得遺憾的，是對手名單上缺了郭富城！
阿澤敢言謂：「今次真係對城城好唔公平！真心覺得佢做得好，成件事好奇怪囉。如果城城入到圍，我一定輸硬，依家反而未必，你話我話嘅！」阿澤更打趣將城城「落選」歸咎是他太帥：「一個咁好嘅演員，竟然冇攞過金像影帝，咪等於當年張國榮演《春光乍洩》出神入化，金馬都輸咗畀《南海十三郎》，好彩我唔靚仔啫。」
自認「梁朝偉頭號粉絲」的阿澤，繼續發揮敢言本色，「批評」偶像的演技：「偉仔無疑係戲精，不過《聽》片唔係佢嘅代表作囉，如果佢憑《一代宗師》入圍，我不如坐喺屋企睇電視支持好過──根本冇得鬥。無論如何，我今次能夠同偶像齊齊入圍，真係好榮幸。」阿澤自言年紀愈大，面對得失的接受力愈強，就如剛過去的金馬獎完結後，他從宜蘭坐車回台北，已將失落影帝的情緒消化：「我係喜劇演員，問心講，攞唔攞獎唔算太重要，最緊要係票房好啫，搵食呀！」說穿了，阿澤仍為《低》片摘下的三千餘萬港元票房感自豪！
張家輝 《大追捕》
杜汶澤 《低俗喜劇》
劉青雲 《消失的子彈》
梁家輝 《寒戰》
梁朝偉 《聽風者》