盧巧音入紙等嫁Sammy

今年38歲的歌手盧巧音(Candy)與年輕4年的樂隊Kolor成員男友蘇浩才Sammy一直有結婚打算,本報記者發現原來二人已悄悄申請註冊結婚。昨日「盧蘇」被發現恩愛逛超市買餸,無名指戴上戒指的Candy更一臉甜蜜多謝記者的祝賀。

近年減產的盧巧音Candy,自與樂隊Kolor成員蘇浩才Sammy拍拖後更為低調,二人拍拖同居多年,一直恩愛如昔。過往一直姊弟戀的Candy,常透露與男友有結婚計劃,惟只聞樓梯響,不過原來前年聖誕Sammy求婚成功,並已申請註冊結婚,今次姊弟戀終於修成正果。昨日本報記者在金鐘婚姻註冊署發現他們的擬結婚通知書,二人均報稱未婚,職業同樣留空,地址同是大坑的愛巢。

同日傍晚六時,Candy與Sammy一同穿上街坊裝,踢情侶拖現身大坑愛巢附近的超市。現場所見,二人似乎買餸玩煮飯仔,期間有商有量,儼如合拍夫妻,及後男方發現記者,即時通水告知未來太太Candy,又調皮地高舉V字手勢,最後由Sammy負責付錢及拿東西。

養肥自己再諗生仔

記者上前恭喜Candy,她一臉甜絲絲表示多謝,只見她左手無名指上戴上戒指,手背更有心心圖案紋身。問到求婚過程?她笑說:「前年聖誕求婚嘅,兩個人喺屋企,好簡單,好低調。(送咗咩畀你?)戒指囉!(籌備緊婚禮?)仲搞緊,其實都未定幾時去簽紙,因為我哋都好忙。(咁急結婚係咪有咗?)有B?我都想,不過真係唔係!」她又謂結婚日子會由父親擇日,應該一切從簡,未必大排筵席。現時正忙於手袋設計工作的她,坦言先養肥自己才生小朋友,又認為BB是上天恩賜的,不能強求!

文:名人組

攝:追蹤組