秋官徐小鳳 送別許佩
資深歌唱老師許佩上月18日因病逝世，享年93歲，昨日在紅磡世界殯儀館設靈，許佩生前圈中好友均有出席送她最後一程，包括鄭少秋、徐小鳳、陳淑芬、謝賢、狄波拉夫婦等。汪明荃、羅家英、陳寶珠、劉松仁、李香琴等好友，雖沒有出席，但亦送上花牌以示敬意。設靈時只是簡單播放了許佩生前片段，沒有任何特別宗教儀式。
秋官表示已跟許佩老師學唱歌多年：「以前每次有演唱會都會跟一跟佢學唱歌。（知佢咩病？）唔清楚，不過都應該係啲老人病，之前佢都講過對腳唔舒服，之後我聽欣宜講佢要瞓床，我本來都想探下佢，不過撞正宣傳電影。（難忘事？）佢畀好多時間陪我練歌，同埋佢好錫身邊每一個人。」
在場幫手打點的馬海倫就表示：「佢（許佩）嘅遺體之後會運返加拿大土葬，會同佢老公同肥姐沈殿霞葬喺同一個墓園。」
