Kelly舞走腩肉 索爆惹人（目及）
已為兩子之母的陳慧琳，又忙工作又忙湊仔，近期更忙跳勁舞，難怪身形fit爆，她出席活動揚言已回復做女時的磅數，索女回歸，即被過百人圍觀。
陳慧琳（Kelly）昨日為意大利鞋履品牌Sergio Rossi尖沙咀全新概念旗艦店開幕擔任嘉賓，着上tube top上衣，全身黑色上陣的她，身形fit到爆，完全不似已是兩子之母。她甫到場即令商場逼得水洩不通，有過百人圍觀，途人還不停舉起手機拍Kelly。Kelly透露最近忙於為張國榮逝世十周年紀念演唱會綵排，她說：「都忙咗好耐，有兩星期，到時自己會唱一part，以勁歌為主，所以不停練舞。（係咪因為咁而瘦咗？）係瘦咗，變番做女時嘅112磅，冇晒肚腩，好開心，可能跳舞、表演有壓力。」
蝦餃仔扮媽咪
另外，陳慧琳又透露熱愛高跟鞋，高峰期家中有過百對鞋，被問到囝囝蝦餃仔會否着她的高跟鞋？她說：「佢唔識着，但會着我嘅拖鞋，跟住話自己係媽咪。」至於蝦餃仔有冇反叛？她即大讚囝囝又乖又聽話，她說︰「佢試過咳，我同佢講食糖同朱古力就會咳到夜晚瞓唔到，跟住佢即時吐出嚟，唔知佢驚死定係乖，但都好勁識聽。」而蔡少芬囡囡有意讀蝦餃仔就讀的幼稚園，陳慧琳即大表歡迎她加入。
文：名人組