胡漢清晤母交支票顯「誠意」
資深大律師胡漢清（Alan）與年屆84歲母親莊永楚（Linda）近日爆發爭產事件，胡母前日聯同契女白韻琹等人召開記者會，哭訴要追索上海物業及逾千萬現金，有指Alan即時相約母親當晚（前晚）秘密會面。昨日記者致電白韻琹詢問新進展，問到二人見面後的情況？白韻琹不欲多談：「因為我遲到，所以佢哋嘅情況係點我都唔清楚，但我去到就見到佢哋兩母子面左左，Linda因為唔舒服，就一味要走先，今（昨）日電話就關機要瞓覺。」白韻琹又透露Alan寫了一張支票托她轉交母親，問到銀碼多少及是否足夠日後生活等問題，她一律表示不方便透露，但就謂Alan很有「誠意」。
至於Alan友人李先生亦承認Alan跟母親見面，問到當時情況，他說：「係有見面，胡生履行咗承諾，但唔方便透露見面內容，總之係有益有建設性，（佢哋嘅問題已經解決咗？）唔方便透露，總之係向好方面發展，（咁佢哋幾時再見？）唔清楚！」對於Alan給母親的支票銀碼，李生續謂不方便透露：「畀當事人自己消化吓先啦，大家都需要下台階！」
