Eason約定迅徒糕興

陳奕迅(Eason)前日雖然宣布「Eason's Life 演唱會」加開五場,但試問又怎能滿足一眾「迅徒」,門票在三個半小時內已火速被清袋。自封「陳奕加」的Eason更連環破紀錄,昨日再度宣布加開三場(25/7-27/7),更創下香港歌手開埠以來優先訂購期間不斷加場的紀錄,合共有20場之多,成為全港No.1,不得不封他為「超人奕加」!

生日唔會加時

Eason為慶祝自己再加三場,刻意在紅館前一手豎起手指,一手舉起三隻手指大擺甫士,認真得戚!而剛巧撞正7月27日是Eason的39歲生日,首次在紅館度牛一的他更約定粉絲出「糕」招,上演一場萬人吃蛋糕:「嗰日嘅觀眾,每人自己帶一塊蛋糕入場囉,到時約埋拎出嚟食咗佢!」鬼馬的Eason又預告不會在「生日場」偏心加時:「唔好以為我7月26日嗰晚會唱過12點,27日都係,唔會因為我生日就特別啲。我個人係好公平,場場都一樣。」

奪命追飛call

Eason雖打破自己三年前開18場個唱的紀錄,但他仍謙虛地說:「我依家又唔係奧運代表,破咩紀錄?我真心多謝大家支持我。」他又自爆近日不停收「奪命追飛call」:「我自己電話一響,全部都唔係問候我,而係問我『飛』!」

文:音樂組