周秀娜爆瘡多人追慢慢揀

甩拖的周秀娜(Chrissie)昨日獲小朋友跪地送花獻吻,令單身的她冧到爆。早前Chrissie被本報拍得與富二代到西貢煙韌吔海鮮,不乏追求者的她坦言常與不同朋友食飯,但她並不心急拍拖,要慢慢觀察揀對象。

「宅男女神」周秀娜(Chrissie)昨日出席時裝活動時,大會安排小朋友跪地向她送上鮮花,及後又攬着她獻吻,令她冧爆。Chrissie坦言:「好耐冇收花啦!大個咗,覺得男仔送花好浪漫,不過拍拖最重要係溝通同開心。」

「人哋有老婆」

早前Chrissie被本報拍得與大陸富二代董路到西貢吃海鮮,兩人親熱地又拖又攬,對方是否追求者之一?Chrissie初時唯唯諾諾,後來說:「佢(董路)只係我內衣生意嘅拍檔,佢喺北京嚟,佢過嚟做完嘢咪一齊食飯,我梗係要招呼佢。(佢單身?)佢有老婆,我都識,不過嗰次佢老婆唔喺度。(你哋又拖又攬?)當日只係朋友食飯,普通禮儀。(拖攬式咁招呼朋友?)唔係。」

捱夜體力差

至於還有沒有新追求者?Chrissie說:「唔知,有同朋友食飯,出街就少啲,冇咁多時間。(有冇合眼緣?)真係要睇吓,我唔心急。」現場所見,她的嘴上生了唇瘡,未知是否因為太dry而生唇瘡?Chrissie解釋說:「呢排唔夠瞓,拍夜戲多,所以身體免疫力差啫。」

文:名人組