黃長興娶妻貪威 三個轆遊街
藝人黃長興昨日與圈外女友Peggy在香港補擺喜酒，除大講愛的宣言，盛讚老婆值100分，又掟出「16萬9千元」開門利是嚇窒姊妹，更出動方中信及吳家樂組成「有得威又唔使戴頭盔」機動三輪車巡遊車隊，「型」娶女友過門。
黃長興與Peggy已於去年8月在法國一酒莊註冊結婚，昨日在尖沙咀洲際酒店筵開35席補擺喜酒，錫到老婆燶的長興，將會場設計成充滿歐陸情調，布置以加拿大楓葉、單車、街燈柱及寫有新人名字的鐵閘，盡冧老婆。
昨傍晚時他與老婆見記者，並四度咀嘴晒恩愛，他透露太太戴了獲贊助商贊助的耳環、手鈪、頸鏈等鑽飾合共50卡，談到新娘手上閃令令巨鑽，長興說：「呢隻係求婚戒指，太太話要五卡以上，我買隻兩卡幾佢戴住先，擺完酒再儲錢買。老婆喺我心目中值100分，對我好好，喺人哋面前好畀面我，私下提點我好多嘢。（你好大男人？）少少，返屋企畀佢做番大女人！」
苦練踢躂舞娛賓
長興續說：「今晚賓客唔多圈中人，只請老婆都識嘅朋友嚟飲。我會同老婆表演踢躂舞，佢冇跳舞底，練咗三個月，佢全晚換四套衫，我換六套，難得做主角吖嘛！我哋喺多倫多求婚，法國註冊，香港擺酒，經歷好長時間，籌備婚禮好多拗撬，過埋今晚，希望放低拗撬，要互相愛同包容對方。」
提到別出心裁以巡遊車隊氹老婆開心，吼準法例容許機動三輪車不需佩戴頭盔的長興說：「我、方中信、吳家樂成班都鍾意玩電單車，今日成班好兄弟一齊好開心，我哋去咗海旁影好多相，呢個天氣揸三輪車好舒服，我都訂咗一架做結婚禮物，成廿幾萬，不過老婆未批。」而為長興擔任伴郎的是胞弟黃長發，兄弟團成員有王浩信、袁偉豪和蕭正楠等。
豪畀姊妹「16萬9」
至於，豪封「16萬9千元」開門利是接新娘，他表示：「起初以為啲遊戲好恐怖，驚兄弟受唔住，點知咁快玩完，有個遊戲我咬住唇膏，喺兄弟外穿嘅底褲寫上『I love you Peggy』，幾好玩，所以姊妹話要99,999元開門利是，我覺得太少！結果我畀咗16萬9千元，係韓國、印尼、馬來西亞、越南貨幣，加埋都有港幣6,900 o架！啲外幣係特登兌，唔係去旅行用剩。（去邊度蜜月？）4月中去法國啲小島，冇預算使幾多錢，酒店一晚頂多七、八千，嗰度又冇嘢買，得椰青，使得幾多？都想蜜月乘機造人，浪漫啲！（送咩結婚禮物畀老婆？）送愛！」
嫁得有情郎的Peggy說：「我都畀老公100分，不過我都叫咗啲姊妹盡情玩新郎同兄弟，我都有份揀玩咩遊戲。（你收到好多金器？）奶奶送咗好多，我媽咪都有送，OK多啦！」
鮑魚燕窩宴客
鴻運乳豬全體
金盞金腿翡翠芙蓉爆蝦球
翡翠竹笙花菇扣原隻南非鮑魚
原盅海皇燉燕窩
清蒸東星斑
乳香脆皮雞
籠仔飄香荷葉飯
鮑汁蝦子金菇炆伊麵
綠茶奶凍紅豆慕絲伴紅桑莓雪芭
幸福鴛鴦點
百萬婚宴
機動三輪車（新人自購）約25萬元
開門利是約6千9百元
結婚鑽戒2卡幾約50萬元
婚紗及禮服約5萬元
酒席約25,000元×35圍
蜜月旅行約10萬元
約共178萬1千9百
新娘、新郎鑽飾（商戶贊助） 約值1,800萬元
賓利花車（朋友贊助）約200萬元
文：影視組