女藝人岑潔儀（Zoey）與老公Dixon人前人後皆非常恩愛，前日是兩人結婚一周年，Dixon除了送Zoey一大紮鮮花及帶她到高級酒店享用燭光晚餐外，更豪送市值900萬的將軍澳一私人屋苑的千呎單位給愛妻。

Zoey昨接受電話訪問時透露結婚周年當日，Dixon先着她到律師樓簽署文件，當時她還感到十分驚訝，以為有甚麼大事發生，豈料去到現場才知道老公是有心為她炮製驚喜，令她十分感動：「之前生日同情人節佢都無送禮物畀我，我本來有少少失望。去到律師樓佢又無端端話約咗人食Tea，叫我自己搞掂，後來我先知佢竟然送層樓畀我！」

Zoey笑言過程不但充滿驚喜，而且十分緊張：「呢次係我第一次簽呢啲文件，佢之前有帶我去睇過嗰個單位，佢話好鍾意，但真係唔知佢會買！」她又直言之後見到老公即忍不住哭成淚人：「我簽文件嗰陣一直忍住唔喊，但之後一出去見到老公就忍唔住攬住佢狂喊，好似拍戲咁！」家陣買層樓咁難，Dixon都仲送層樓畀老婆，Zoey梗係冧到爆啦！

文：專案組