鄧麗欣認核突樂仔唔吼

鄧麗欣於新戲《不愛不散》與男友方力申再度合作，卻被拆散情侶檔，改與內地主持人何炅發展感情。談到有報道指Stephy向Kary直斥樂仔花心而令姊妹情生變，Stephy否認說：「我都係朋友講先知我哋又傳不和，篇報道想像力太豐富。佢哋嘅戀情我跟唔到咁多，不過我有Send短訊問Kary做乜去旅行唔預我，但佢冇覆。」

暗讚男友

有指余文樂曾背着前度女友黃伊汶力追Stephy，她回應說：「我哋嗰時合演《塚愛》，我個造型好核突，佢應該睇我唔上，之後都冇再聯絡喇。」問她可覺樂仔花心？在旁的蘇永康搶答：「樂仔係圈中好仔、好勤力，拍戲時就算冇佢戲份都會喺度睇，而且佢係運動型，冇乜壞習慣。不過佢同Kary可以唔使咁腼腆，可以企定定畀大家影，咁樣大家都方便。」Stephy和應說：「佢（余文樂）工作態度好好，我都鍾意做運動嘅人！」明顯向身為游泳健將的方力申大派定心丸！不過當問到二人何時結婚，Stephy立即大耍太極：「未得閒！（有冇同你求婚？）都冇呀！」

Stephy與蘇永康齊聲讚余文樂工作態度好。

Kary被指可與樂仔企定定拍照，更顯大方得體。

此外，趙榮及羅心悅被問到《低俗喜劇》遭內地藝評人賈選凝炮轟低俗的風波，二人同時力撐該片沒有歧視內地人，趙榮表示：「可能唔識聽廣東話先會有文化差異，套戲去得幾盡，有黑色幽默。」

文：音樂組