薛凱琪升cup 撐阿澤慘受奚落
杜汶澤一連三場的talk show前晚於會展圓滿結束，早前連續吊高完周秀娜及陳靜（DaDa）後，向來身材如「飛機場」的薛凱琪（Fiona）即「谷胸」上陣，更自言遠赴韓國隆胸，卻被阿澤取笑胸大好奇怪，其緋聞更被搬到台上：「如果你係大波，房祖名就一早吼你啦！」
杜汶澤一連三場的《咔啦騷》終於圓滿結束，太太田蕊妮、好友彭浩翔、曾國祥、唐詩詠等到場支持。阿澤頭兩場吊起性感女神周秀娜及陳靜扮成太空人後，前晚竟落差甚大，請來身材平平無奇的Fiona。
當工作人員為身穿吊帶短裙的Fiona除下太空裝後，大玩驚喜，原本A級上圍升至C級，誰知阿澤公然批評Fiona：「你頸長膊頭窄，個波咁大真係好怪，你屋企邊得嚟咁大個胸圍？」Fiona聽罷即反駁：「我特登去韓國隆胸o架，個胸圍我問媽咪借o架！」阿澤又不忘將Fiona緋聞男友方大同和房祖名擺上台，令她尷尬非常， 阿澤說：「希望你快啲溝到方大同和房祖名，不過如果你係大波嘅話，房祖名就一早吼你啦！」其後兩人繼續話當年，二人更一度擁抱，阿澤又踩Fiona：「都叫你唔好用平嘢o架啦！你個胸咁硬嘅！」令現場觀眾笑聲不絕！
爆風流史 搞喊老婆
其後阿澤繼續在台上大爆風流史，坦言感激老婆不離不棄，令台下的田蕊妮感動落淚，場面感人。完騷後，二人在後台見面深情咀嘴，更應記者要求連咀二次，冧爆全場。田蕊妮事前表示並不知道阿澤大爆風流史，坦言阿澤刻意隱瞞：「佢綵排我都有去，但佢只係綵排前半part，平時喺屋企讀劇本又唔讀出聲，仲將劇本放喺枕頭底添！」對於老公大讚自己是好老婆，田蕊妮眼濕濕表示：「佢將個光環套落我度，佢識得欣賞我嘅優點，嫁畀佢我覺得好幸福。」
至於揚言不會再加場的阿澤表示七月將會到澳門舉行talk show，如反應熱烈的話，會考慮到歐美等地演出：「澳門無咁多限制，到時粗口都會講多啲！不過唔會考慮去內地搞talk show。」問到如何補償老婆？他說：「好好照顧自己同佢就好足夠啦！（老婆喊？）佢覺得自己好陰功，有苦自己知！」
文：專案組