伍姑娘慶生靚靚送金幣
今日才是正日生辰的伍詠薇（伍姑娘），前晚便相約一班圈中好友包括袁詠儀（靚靚）、張智霖、蔡一智夫婦和陳敏之等在中環一間餐廳內預祝牛一，由老公練海棠和黃佩霞為她包場舉行派對，而有金幣朱古力鋪面的生日蛋糕則由靚靚送上，氹得伍姑娘相當開心，老公因知她愛80年代音樂，特別搵DJ朋友摷來大批金曲，伍姑娘興奮得與到賀的蔡一傑狂舞，以「愛人」相稱的阿傑事後更上載二人的合照到微博。
狂歡過後，壽星女昨日睡至傍晚才起床，她在電話中說：「老公為我準備香檳之夜嘅主題派對好感動，而好姊妹敏之送我一對好靚嘅水晶杯，（金幣蛋糕暗示你鍾意錢？）其實靚靚咪一樣鍾意。」眾人玩至凌晨二時多便離去，靚靚兩公婆和阿智等更結伴到擺花街攞車返歸。
