亞視慳家團拜 巨獎5舊水

亞視昨日在大埔總台大搞《亞洲電視新春團拜2013》盆菜宴，向傳媒祝賀新禧，但一眾行政人員和藝員卻未能坐滿5圍，加埋傳媒才剛好筵開六席。是次新春團拜，每盆盆菜僅$1050，但鮑魚、髮菜欠奉，而汽水亦只得一款供應，最慘是在場工作人員未能同桌享用，有員工更表示：「食你哋食剩嗰啲！」慘情程度令人咋舌！

至於抽獎環節，計有14份連鎖超市現金券、2份$100現金獎、7份$200現金獎，而壓軸大獎則是$500元現金獎。堂堂電視台，壓軸獎只得5舊水，未免有點寒酸。不過壓軸大獎得主、有「亞洲之子」之稱的亢帥克卻開心獲獎，更在微博上載現金獎的相片，分享喜悅，但有網民取笑他，$500足夠可以過肥年。而星光幫出身的亢帥克，只作席上客，反而由前亞姐張家瑩、顏子菲、徐丁等人咪嘴跳唱串燒賀年歌，騎呢到你唔信！但張家瑩以一襲粉紅透視上衣表演，總算養眼。

亢帥克 （前排右三）與同席同事一齊拜年。

無綫早前搞盆菜宴，曾志偉等人響應支持。

葉家寶唔想有廚餘

是次團拜的獎品加盆菜，只值$10300，食剩的又有工作人員包底，夠晒實際和環保！之後記者致電亞視高層葉家寶，他謂：「今次冇贊助，全部公司畀！（寒酸？）唔會，有蝦o架！唔想剩咁多廚餘！（工作人員要食剩餸？）佢哋要做嘢啫，做完先食。」他透露本月28日公司內部會大搞團拜兼慶祝三月生日的藝員，屆時會有足金擺設抽獎，真係聽到都興奮！

亢帥克中壓軸現金獎，興奮得在微博分享喜悅。

放大圖片

盛品儒否認拒合照

另外，有份出席團拜的亞視執行董事盛品儒，對於有指日前他拒絕和香港電視主席王維基合照，他尷尬解釋：「冇啲咁嘅事！節目差唔多開始，人又比較多，冇留意到，之後佢拍咗我一拍，我有同佢笑一笑！（介意合照？）好多嘢入咗法律程序，所以要忌諱少少。」他又指新一年希望多一點良心，少一點紛爭，更透露今年有意開拍電視劇，張家瑩亦表示歡迎。

文：影視組