萬綺雯派柑遇襲 中頭獎

萬綺雯 (蚊蚊)昨日隨劇集《老表,你好嘢!》拍檔上街派柑宣傳,吸引過百路人爭搶,但有路人將柑扔返轉頭,蚊蚊不幸遭殃「中頭獎」。蚊蚊事後指摘在旁的張繼聰未夠眼明手快,護花不力。另外,《老表》監製乘勢宣布公司眼見劇集收視理想,決定落實加開續集及電影版。

藝人王祖藍、郭晉安、萬綺雯等昨日帶領劇集《老表》一眾演員到尖沙咀鬧市宣傳,有少女眼見《老表》演員後喪嗌尖叫,風頭一時無兩。眾演員手拖手向途人鞠躬感謝觀眾支持,之後便大派過年柑,吸引過百人爭相搶奪,期間有路人將柑扔返轉頭,萬綺雯不幸遭殃「中頭獎」,場面混亂。慘被扑頭的蚊蚊表示自己成身柑味,「中招後」即暈一暈:「嗰下好大力,佢扔到啲汁都出埋,好彩我都食過夜粥無事,當『中頭獎』囉。」她更指摘當時企在身旁的張繼聰護花不力:「佢唔夠眼明手快接住佢,下部劇再合作一定會折磨佢。」

眾演員「遊街」後步行到附近酒家飯敍,監製黃偉聲在席間突然收到無綫高層電話,隨即宣布《老表》已落實開拍續集及電影版,令眾人喜出望外,對續集表示期待。王祖藍表示對續集又驚又喜,他說:「喜嘅係證明公司支持我哋,驚嘅係要再諗二十集劇情,要同啲編劇傾吓。(怕唔怕你又寫令編劇不滿?)唔會,合作過程愉快,可能有少數其他聲音,不過有啲人都唔再喺公司。」

王菀之乘勢加價

問到無綫可因多投訴而限制提及中港矛盾,祖藍說:「公司有提點,太敏感唔好做,同埋之前已過濾咗一次,今次批得就可以繼續。」而王菀之今次拍劇令人刮目相看,她對開續集感高興,更笑言要加價:「我都無話接,要乘機坐地起價過肥年。(能分身參與續集?)希望就到大家啦,我始終都係一個歌手。」

文:影視組