司馬燕無胃人生 難平臥進睡
昔日縱橫Ball場的司馬燕去年不幸患上胃癌，要立刻切除整個胃部，現在仍要接受化療，並展開無「胃」的日子。司馬燕從未為這一役哭哭啼啼，反而感謝上天給她抽到這支好籌，同時勉勵病患者要積極過每一天。就算不能平臥進睡，又要狂食抗病，司馬燕依然勇敢面對人生。
昨日《好報》獨家披露司馬燕去年十月發現患上胃癌，要立即接受切除胃部手術，現在更要定期接受化療。最近剛完成第三次化療、在家靜養的司馬燕，剪了一頭短髮，接受本報訪問時，直言要感謝上天為她安排完美計劃。
本來隨丈夫舉家移居到北京的司馬燕，去年中因丈夫調返香港工作，司馬燕要立刻打點張羅返港事宜，包括搵屋及替兒子找學校，期間已感胃部不適，醫生指她有幽門螺旋菌，並檢驗其癌指數屬正常。司馬燕在北京時體重達107磅，但日漸消瘦，返港後繼續出現胃痛、嘔吐及飯後頂着心口等症狀，惟有另找醫生診治。
感激完美安排
「個天真係對我好好，等我一腳踢搞掂晒搬屋嘅嘢、去埋個旅行，先至畀我知道有呢個病，簡直係perfect planning！因為腸壁大動脈有個好似馬蹄咁大嘅瘤，如果要割，就會令條腸枯萎，加上醫生驚我有其他隱藏嘅癌細胞，所以要做化療。依家小腸駁咗去食道，冇咗個胃啩，所以化療後冇嘔，又冇甩頭髮，我真係好幸運o架喇！」司馬燕說。
羅漢果水當酒
現在體重只有80磅的司馬燕，因沒有胃部，睡覺也不能如常的平臥，她要在特製的床上睡，還笑言被朋友讚「高了又瘦了」，更被取笑說話聲量太大。司馬燕出名酒量好，問到飲酒是否致病原因之一？她說：「冇得咁樣諗番轉頭，好多人唔煙唔酒都有肺癌或肝癌啦！我怕有激素毒素都冇食牛食雞成六、七年，好多嘢係整定。好似聖誕節時，我打畀醫生問可唔可以飲少少酒，醫生話唔好，我都係『嗒』吓就算，我真係唔夠膽飲，不過唔緊要，我有羅漢果水，啲色同酒好似，係自家Brandy，哈哈！」
現在過着無「胃」日子的司馬燕，奉行少吃多餐，同時要打好身體底子以應付化療。司馬燕每天要煲幾種湯水來伴着質地較溶的飯及麵來吃。「醫生要我每日吸收大量卡路里，每日要飲六、七杯奶、八隻蛋，又要食朱古力，未病前，我係一個唔鍾意食嘢嘅人，依家真係要食番晒過去五十年嘅quota。」
勸人積極面對
談病情談得雲淡風輕，司馬燕說上了人生寶貴一課，並勉勵病患者及感失意者，要積極面對。「世界上有咁多種危疾，我有胃癌已經算係執到支好籌！朋友問我係第幾期，我冇問，醫生冇講，我話『求其』，第幾期都要去面對，我咩都唔諗，全部交畀醫生去處理。個天畀你生存多一日，你要好好珍惜，如果成日自怨自艾，根本冇好好真正活過。見到有人唔開心要自殺，我真係好Sad，好多人用盡方法去生存，如果嗰啲人真係咁睇唔開，不如之前寫定張器官捐贈卡，起碼可以造福其他人。積極正面去面對去過日子，先可以對得住自己，起碼有日我真係走，我都可以講句：『I do my best！』」
司馬燕感謝朋友的關懷，已出家的表哥葉青霖主動噓寒問暖；黃百鳴夫婦親自探訪及帶她一起學氣功，一切一切令她暖在心頭。司馬燕更不怕忌諱諗定「後路」，計劃葬禮在酒吧搞，讓到來的親友開開心心飲吓酒，比哭哭啼啼更好。」
文：專案組