胡敏珊為杜宇航減壓
鐘錶界美女胡敏珊、闊太甄楚倩和何家長房女兒何超雄前晚在會展出席大寶法王的佛學講座，胡敏珊日前被《好報》獨家報道與動作演員杜宇航禁室培情六日，踢爆姐弟戀！對此胡敏珊否認戀情：「係誤會，大家都單身，做朋友冇所謂，但絕對唔係你哋所諗咁！（叫佢嚟聽講座？）我都有同佢講佛、講人生，其實我係治療師，一向有幫朋友減壓，好多圈內人都有幫過！（介唔介意畀人講姐弟戀？）唔介意呀！我個樣咁細個！」
甄楚倩連日來都有出席法王的活動，有傳邱淑貞（豆斗）和王菲鬧不和，甄楚倩就為二人解話：「佢哋係信唔同嘅師父，但係大家都係信徒唔會有爭執，同埋我識嘅豆斗好和藹，唔會同人有爭執！」