冇事搞事,我都費事理

黃秋生昨日坦言未見「和事老」譚詠麟有任何實際行動,他說:「佢貪口爽,落咗台就冇回事啦!(真係約high tea,到唔到?)佢亂噏,你哋就當真,我同佢又唔熟,九世前拍過戲,我同曾志偉熟啲。本來就冇事,都唔知佢提嚟做乜?冇事搞事,我都費事理。(點睇佢話量度有多大,成就有多大?)謎思嚟喎!根本冇關係!依家發生乜事先?好笑,話我借佢(羅志祥)炒作博宣傳?我開演唱會咩?我日日喺屋企炒餸,我炒作嚟等我個仔知我係佢老竇呀?」

對於阿倫口頭上的「義不容辭」,秋生說:「佢根本唔知件事,講嘢前諗吓,會惹起事端o架,譚詠麟哥哥!又唔知源起,我只係話《賽德克‧巴萊》好睇,啲人就喺我微博話我鬧人,等如譚詠麟話做和事老,我發動三千人去佢微博講粗口,佢抓唔抓頭?我真係唔想再同呢件事有任何關係,我依家精神上被人非禮呀!我求嗰啲傻嘅、癲嘅,唔好再滋擾我,我年紀大啦、老啦、行唔郁啦,讓吓我啦,我知錯啦!」