陳敏之爆森美狂吸百萬

情侶新組合森美和陳敏之在《法網狙擊》中大團圓結局,二人為觀眾受落,敏之更大爆帶挈了森美接了多個廣告,進帳過百萬元,賺夠奶粉錢,森美承認工作還陸續有來,新一年可謂豬籠入水。

演員森美、陳敏之、陳煒和郭政鴻等一眾演員齊齊相約酒樓食飯睇《法》劇大結局。由於森美和敏之這對情侶新組合大為觀眾受落,吸引不少廣告商垂青,期間敏之更大爆森美因此劇而賺多了不少奶粉錢。森美亦承認︰「係帶挈我接多咗幾個廣告代言,仲有一個代言傾緊,有過百萬收入進帳。」他又笑言自己是跟無綫小生搶飯碗︰「敏之都有個瘦身廣告,大家都有收穫。」

贏亞視就掂

對於日前有網民指出劇集內容多犯駁位,森美卻大撐劇情合理,另更指不介意大受注目之劇集《老表,你好嘢!》搶了尾彩:「我哋夠搶咗《大太監》尾彩啦,一劇接一劇就係咁,總之贏咗亞視就得啦。」

在《法》劇中另一對情侶煒哥和鴻仔因有連場「激戰」,問煒哥她老公有否看到「眼火爆」時,煒哥笑說老公還未看︰「唔怕佢會呷醋,佢事前已經知道會咁激,佢係一個專業觀眾。(二人船艙有更激親熱鏡頭?)刪剪好多,可能監製將刪走嘅片段留嚟私人珍藏,最好可以推出《法》加長版,咪可以公諸同好囉。」不過,鴻仔對二人「激戰」親熱戲出街後卻有所期望,並搞笑說:「應該唔會有人搵我哋拍三級片啩!」

另陳煒昨日為新劇進行拍攝,她繼《法網狙擊》後再度演奸角,笑言演奸角純粹巧合,對於《法》劇泳衣造型被大讚身形寶刀未老,煒哥笑謂:「我好辛苦幾日冇食飯o架!就係冇信心先要keep!」

認有送外賣

此外,敏之昨日與郭晉安為無綫節目《新春自家菜》錄影,期間被問到她被影到給男友送「人肉外賣」?敏之快口回應:「係呀!我送外賣!」身旁安仔即提醒她「外賣」另有含意時,敏之即急忙否認說:「吓!當我冇講過!我真係送外賣去佢度咋!」

文:影視組