祖兒挾13.5獎 終極大贏家

樂壇天后容祖兒昨晚在「十大中文金曲頒獎禮」繼續狂掃4獎,再度冧莊「最優秀流行女歌手大獎」,連續9年坐穩「長勝歌后」之位!而陳奕迅(Eason)亦成功擸走5獎,8度奪得「最優秀流行男歌手大獎」,惟四台總成績埋單,祖兒共得13.5獎險勝12獎的Eason,成為終極大贏家。

2012年度最後一張樂壇成績表「第35屆十大中文金曲頒獎禮」昨晚派出49個獎項大分「豬肉」,「優秀流行歌手大獎」及「十大金曲獎」均增設至12個之多。身穿黑長裙配銀色閃爆大頸鏈的祖兒連環吸獎,更9度榮膺「最優秀流行女歌手大獎」,坐穩「長勝歌后」之位。

投訴耳機太細聲

沐浴愛河中的祖兒獲頒「金曲獎」時,被頒獎嘉賓李克勤形容是「嘴角含春」的女歌手,美中不足的是男友劉浩龍缺席冇影。

Eason昨晚亦奪5獎的亦掃獎掃到手軟,在獻唱金曲《重口味》時,因音量太小而指住耳機大叫「聽唔到」。最終祖兒在四台頒獎禮上共得13.5個獎而成為最終大贏家,可謂由頭帶到尾。而緊隨其後的Eason因四大與無綫仍未和好,所以無緣參與「十大勁歌金曲頒獎禮」,最終只能共得12獎,以1.5個獎之差輸給祖兒。

甄妮又寸G.E.M.

而日前殿堂歌手甄妮鬧爆鄧紫棋(G.E.M.)冇禮貌後,兩代「鬥氣巨肺」昨晚首度同場,甄妮在台上再度發功寸爆G.E.M.:「最緊要打招呼,我返嚟經常有唔同面孔,有時好想打招呼,唔知識唔識好驚面懵……一個優秀歌手要色香味都正,唔係唱歌唱得好就得,千祈唔好目中無人。」前輩句句有骨,當鏡頭影住台下時,G.E.M.未見影蹤似乎刻意避席。

而甄妮亦曾多年前怒斥Eason在飛機上太嘈吵,當頒獎給Eason時更自吹教導有方:「都係我教佢教得好先有今日。」Eason亦半下跪接獎,又與對方一「抱」泯千仇,並預祝甄妮個唱成功。而「歌神」張學友奪得「金曲35周年榮譽大獎」時獲得全場歡呼。

放大假為理由的古巨基缺席四台頒獎禮,但昨晚依然奪得兩個獎,分別是「優秀流行歌手大獎」及憑《戀無可戀》奪得「金曲獎」,不過電台方面未有安排唱片公司人員上台代他領獎,而且還被DJ暗寸他:「有啲歌手考完試又唔攞成績表,教壞細路。」

文:音樂組

第一手消息請下載on.cc東方互動iPhone/iPad/Android Apps