黃智雯「旺夫」唯唯黐住搵食
藝人梁烈唯（唯唯）與黃智雯昨日為《新派煮意》進行錄映，由於是在新春時播映，唯唯一身紅噹噹打扮，黃智雯亦以紅白相襯，兩人儼如情侶。問到兩人會否繼續「情侶檔」搵食，唯唯說：「我梗係想啦，我聽佢（黃智雯）講，原來佢好『旺夫』o架，佢話羅仲謙本來好兜踎，同佢拍完《搜下留情》就冇人唔識，我同佢拍完《缺宅男女》，都多嘢撈咗，仲有戲拍，佢最近接咗護膚品代言，於發布會活動時仲帶挈我做表演嘉賓，大家載歌載舞，賺番一筆。」
黃智雯承認接了個護膚品廣告做代言人，但廣告是在她得獎前接下的，她未有抬高身價，她說：「咪聽，佢整蠱我亂講，我冇話羅仲謙兜踎，我同佢講話有人講我鼻大旺夫，我想佢帶挈我拍電影就真。」