鄧健泓隨時戀張嘉兒

鄧健泓、陳茵媺和沈卓盈昨出席「櫻花連心迎新春」活動，與港姐張嘉兒傳緋聞的鄧健泓，日前再被影到二人行街睇戲，對此他說：「好平常朋友食飯睇戲，當時有其他朋友喺度。再講多次我同嘉兒係朋友，佢冇上我屋企，依家我好似唔可以同女仔出街，無論點都畀人講，一有女性喺身邊就有問題。（話張嘉兒行後巷去你屋企？）其實去到7-11已經走咗。」問鄧健泓與張嘉兒有否機會發展？他說：「隨緣，現階段想做好隊band，（以後唔敢單獨約會？）點解我冇識朋友嘅自由。（依家單身？）梗係單身。（嘉兒被指係第三者，會唔會令你唔敢追？）冇咁嘅事，之前我同龔嘉欣都喺微博澄清咗，將來係點唔知，但佢一定唔係大家咁講。（報道出街後有冇打畀嘉兒？）有，佢冇嘢。」