Ana R.接花球 男友尷尬
蜜運中的名模Ana R.前晚與男友Brad結伴出席好友周汶錡的結婚派對，席上Ana更幸運地首次接到花球。她說：「我覺得好意外，冇諗過會接到，我接到時全場反應好熱烈，大家都即刻望住Brad，搞到佢好尷尬。（你今年內結婚？）我哋拍咗幾個月拖咋，唔會咁快。」
其實新娘子原意想將花球拋給胞妹周麗淇或陳嘉容（Eunis），但最終事與願違。失落花球的Eunis笑言戥Ana高興，希望對方結婚時會將花球拋給自己。Eunis說：「其實當晚有人嗌我個名，但我冇企出嚟，因為之前去好多婚禮，我都唔怕醜咁搶花球，但都失敗，所以尋晚就索性放棄。」另外，Julien在婚宴上致詞時，周汶錡一度感動到眼濕濕，場面感人。
