沈震軒肉搏梁敏儀飲酒壯膽

現年29歲的沈震軒認真好艷福,繼與34D內地演員劉羽琦於大銀幕「打野戰」後,再跟34C性感女星梁敏儀床上肉搏,又打又摑五粒鐘!擁豐富性感演出經驗的梁敏儀聲稱,是從影以來至激至震撼的一次!沈震軒則直言尷尬,要飲酒壯膽。

沈震軒(Sammy)早前跟擁有34C好身材的梁敏儀(Winnie)於新片上演床上肉搏戰,看得眾人血脈沸騰!拍攝當天,床上激戰四、五個鐘的Sammy坦言有點尷尬,事前須飲酒壯膽:「Winnie好專業同好信任我,所以好快就拍完!我個角色癲架,所以拍床戲嗰陣會無啦啦打佢、摑佢!但我好慢熱,拍Love scene一定要靠酒精放鬆。(睇AV做準備?)唔需要,我又唔係小朋友。」

表現癲喪性格

Sammy又稱事前有跟幕後度床戰:「我明白呢場戲要帶出Anna姐同o靚坤點解要搞埋一齊。雖然我底線set到好低,但希望出嚟效果可以交代到件事,又唔好太過分。」

擁有豐富「床戲」經驗的Winnie指最緊要遇好對手:「Sammy好專業,佢係實幹型,所以我完全放心。就算之前有好多性感演出,但每次都有心理關口,而今次同以往唔同,要表現我哋兩個癲喪嘅性格,所以畫面上好震撼,都係我從影以來意識上最激嘅一次,接之前都知要拍呢場戲,我都真係有花時間考慮,但呢套係好經典嘅戲,所以都接咗。」

談到《古惑仔:江湖新秩序》「o靚坤」演技出眾,Sammy自爆不愛看黑社會片:「雖然唔鍾意,但做演員乜都要識,盡量接觸好多嘢。o靚坤唔係典型江湖大佬,係一個小人、過街老鼠,所以我將成個人收埋,再配合依家啲壞人會食藥,所以佢成日精神恍惚、癲癲喪喪。喺外國讀書時見過吸毒係點,都有問朋友意見。」

對票房有信心

對於該片遭網民負評,Winnie說:「好多人覺得同第一集有好大對比,但我覺得係好事,起碼佢哋有留意,分分鐘佢哋係第一批入場睇,睇吓同第一集有咩對比。條宣傳片點擊率都上升咗好多,證明好多人留意套戲,所以有信心票房會唔錯。」Sammy則認為是師奶心態「愈鬧愈想睇」。

文:影視組

沈震軒服裝:IT izzue

梁敏儀髮型:pop eight to ming

梁敏儀化妝:Pinko.C

場地:帝盛酒店