成龍約曼玉開餐 再續戲緣
武打巨星成龍昨日到救世軍總部出席《第十八屆羽絨城．成龍送暖行動》，向多位長者派發羽絨及英皇新片《十二生肖》戲票，希望他們有個暖笠笠冬天，氹得一班長者笑逐顏開，有婆婆更大讚成龍靚仔。
善心爆棚的成龍稱今日將到河北送出一萬件羽絨，問到除夕倒數如何度過？他說：「留喺屋企，費事同人逼，好平靜咁過，冇開Party。（囝囝房祖名呢？）佢喺北京。」他透露今年會開拍《警察故事2013》，但卡士未定，問會否聯絡曾經合作、甩拖不久的張曼玉？他說：「佢又甩拖咩？好耐冇聯絡，約佢食飯傾吓先。（搵佢客串？）好呀！」
拒答敏感話題
近年成龍的言論經常惹起是非，昨日他顯得甚為避忌，問到其言論風波及元旦日市民遊行等問題時，他答：「你話呢？你哋覺得呢？短短幾分鐘唔夠講，唔想被人撮寫幾句做標題。」問擔不擔心是非影響票房？他說：「大家都有言論自由，可以唔贊成我，但我都會尊重人哋意見。新戲好似內地都收六億，又做咗東南亞票房冠軍。」
對於同期上映的內地電影《人再囧途之泰囧》票房收逾十億元人民幣，成為首部華語片有此佳績，成龍認為有更多人支持華語片是好事。而投資只有約三千萬元的《人》片正挑戰內地史上票房冠軍、收十三億元的荷里活巨製《阿凡達》，主角王寶強及徐崢在微博表示很開心，製片方驚喜地表示想也沒想過。
文：影視組