Shine梁炳排骨三人組
前晚組合Shine完成紅館舉行的《SHINE PASSION LIVE》個唱，圈中好友包括徐濠縈及黃又南的前緋聞女友杜如風等現身支持，又南一度唱到喘氣兼瞓地，天佑忍不住寸他：「你個樣好唔掂喎！」
身為表演嘉賓的梁漢文嘲笑Shine入行時瘦到似蜘蛛，他說：「好多人見到我，會好奇怪點解有人類可以咁瘦。到Shine入行，我發現自己有同類，佢哋啲排骨好似蜘蛛咁。」又南在個唱中自爆跟圈外舊愛的情史，不怕對方嬲，第一次在紅館開騷，可以大膽提以前深刻的感情。而天佑為令母親釋懷，特別準備悼念亡父環節。