祖兒送吻祝賀 師兄：屋企嘢唔講
自「龍兒戀」被踢爆後，容祖兒與劉浩龍（師兄）都甚少在公開場合上碰頭。前晚叱咤舉行慶功宴，祖兒主動與師兄合照，問到師兄有否收到祖兒的吻賀時，師兄甜到漏說：「屋企嘢公眾場合唔講喇。」
叱咤樂壇頒獎禮前晚圓滿結束，一眾得獎歌手如容祖兒、師兄、陳奕迅等均有出席慶功宴，惟「我最喜愛的女歌手」楊千嬅因趕早機而未能出席。繼頒獎禮上，祖兒與師兄的公開握手引起話題後，慶功宴上的焦點又再次落到「龍兒」的世紀合照上！
正當司儀安排得獎歌手逐一上台影大合照兼祝酒，等埋位的師兄與祖兒原來近在咫尺，旋即引起現場記者舉機喪影，與師兄相隔五、六個身位的祖兒更主動表示：「你哋（記者）係咪要借位影呀？」說罷就主動走到師兄身旁，識做的師兄更挨近祖兒，兩人一副冧樣大方任影！不過，世紀合照維持不久，就被祖兒的助手「棒打鴛鴦」，助手拉埋羅力威及馮允謙攝位隔開師兄之餘，更以其身體遮擋祖兒。
戥對方開心
談到獲獎感受，相隔八年再度奪獎的師兄坦言非常感動，問到可想由祖兒頒獎？他扯開話題說：「由兄弟頒畀我最開心！（咁大方同祖兒握手？）恭賀啫。」問到祖兒的吻賀兌現未？師兄甜笑幾秒，並說道：「屋企嘢公眾場合唔講喇。（祖兒好旺你？）佢叫阿祖，唔係阿旺呀！」
祖兒亦坦言為師兄得獎相當高興，至於有冇送吻祝賀？她笑言：「上次還上次，今次還今次，其實有啲歌手比較幸運，好快得到認同，有啲就要等，但證明等係值得。」另外，她又指出：「其實握手有咩問題？要恭喜就做o架啦！（頒獎禮上經常擰轉頭同師兄傾偈？）我都有同東南西北方向嘅人傾o架，個騷咁長，唔傾偈唔知做乜。」問到祖兒可有留意G.E.M.（鄧紫棋）暗寸叱咤短片？她直言：「我唔覺得佢有問題，世界冇懷才不遇，努力同實力戰勝一切！（何韻詩喺微博教訓G.E.M.？）分享意見啫。」
文：音樂組