星光女陳蕾踩車趕堂暈低

亞視舉行演藝培訓班，老闆王征不滿課程「冇人吼」，連炒四名缺席的藝員包括前港姐戚黛黛、男藝員張啟樂、o靚模陳綺雯（Aki）及主持車車（張紫櫻），其後有指不聽話的藝員將陸續被炒，惹來全城熱話！

人在心不在

亞視後來發聲明表示課程不是「政治洗腦班」，昨日更開放予傳媒「Sit堂」，多名藝員乖乖上堂惟恐被炒，接受監製高志森及前亞姐宮雪花的授課，出席者有亞姐姚嘉雯、王家敏、星光幫亢帥克、陳蕾、古卓文及蔡國威等，然筱靖及李建龍被發現玩電話，馮家俊則頭耷耷疑似瞌眼瞓，似乎不夠專心。

陳蕾趕入「課室」時，導師高志森已經講緊課。

暈得一陣陣

已鐵定冇得留低的Aki昨午返亞視收「大信封」及「執包袱」，未料再發生不愉快事件，她被大閘保安視為外人，一度被拒入內，雖然最終仍可到藝員部收信，Aki已一肚火，發現記者時即要求離開大堂出閘才受訪，免再受氣，她直斥保安態度差及亞視冇人情味，問到缺課有否通知亞視？她說：「有，今次係無理解僱，佢要咁講都冇辦法，呢度根本唔配叫良心機構！」

陳綺雯已被炒，昨日收大信封時一度被拒入內，激到一肚火。	筱靖（右）上堂玩電話，唔專心。	蔡國威（左）頭耷耷，馮家俊聽到瞌眼瞓？

另方面，星光幫成員陳蕾為了準時上課「趕頭趕命」踩單車，可是因空肚血糖低在電梯內暈倒，她希望亞視可提供津貼方便他們坐的士：「我好驚遲到，一泊低單車即刻跑入公司，結果喺架（車立）度暈低。（驚被炒？）每個上堂嘅都驚。（返學好吃力？）時間分薄咗，搵錢機會少咗，不過都OK嘅。」不過她身穿的上衣印有「SKOOL SUCKS」（學校，爛透了）字樣，暗指上堂冇用，一於向亞視作無聲抗議！

遲到唔怕炒

高層葉家寶對於陳蕾暈倒，他聲稱亞視着重藝員健康，但不會取消早堂：「佢有哮喘，近日天氣變化，但準時係應該，早啲起身就唔使咁趕。（取消上晝堂？）唔會考慮！點解08通告可以準時，上堂就遲到？」對於馮雪冰、蒲進及甄詠珊已缺席兩課，問到會否有所行動？他說會先跟他們好好溝通，提到蒲進斥導師唔夠班及與亞視理念不同，葉家寶說：「夠唔夠班唔係藝員決定，理念可以傾，會再畀兩日時間佢考慮！」

至於曾傳是高危被炒一族的亞姐王家敏繼續「唔識死」遲到半小時，她解釋身體不適往睇醫生，不怕累積三次會被處分，更賣口乖狂讚導師，說得益良多，筱靖亦加把口說教學精彩。

文：影視組