余安安活出快樂人生

婚姻對一個女人來說，比任何事情都重要；那對於婚姻失敗過的女人，又會如何看？53歲的余安安曾經歷兩次婚姻失敗，現在單身的她，對「婚姻」這兩個字會看到甚麼？怨恨抑或後悔？她說：「我從來做事都唔會後悔。人生嚟嘛，總會有高、低潮，當中一定有過程，而婚姻失敗就係我嘅過程。後悔？呢啲係自己揀嘅。」安安坦言對自己做的事十分肯定，不會出現遺憾。

呼籲女性獨立自強

從此，她變得更自強，讓她體會到原來女性是需要獨立，是需要去活出屬於自己的美麗人生，而不應依靠男人生存。安安說：「我覺得婚姻唔係必須，應該去諗點樣活出人生，並唔係靠一個人去畀快樂你。就算嗰個人喺你身邊，但你唔懂得去尋求快樂，都唔係快樂；相對，冇一個人喺你身邊，但自己識得點去活出精彩人生，呢樣嘢先緊要，睇自己想唔想得通。」她認為最重要是身邊有一群好朋友，認為知己比伴侶重要得多：「就算有冇另一半，一個人一定要有朋友。就算有丈夫，都唔係24小時陪住你，佢有佢事業、有佢生活，只不過係夜晚或者某啲情況下冇咗另一半照顧。」她把婚姻看得非常通透，呼籲現時女性要學懂做個獨立自強、剛柔並濟的女強人。對於安安來說，快樂是漫長人生中首個要求，要懂得愛錫自己：「如果自己都唔愛錫自己，唔識得點生活的話，我覺得好可悲！」

安安與兩女兒感情要好。

放大圖片

真正享受演戲樂趣

跟首任丈夫周潤發曾被喻為金童玉女，因合演電影《池女》而戀上，1983年閃婚，但婚姻只維持9個月便告終；而1987年與第二任丈夫李萬祺婚後專心相夫教子，可惜亦只能維持16年，而安安離婚後即復出影壇繼續其演藝生涯。同時要照顧兩個女兒李文琪和李文騫的她，慨嘆工作上的辛苦：「做嘢搵錢一定辛苦，但我覺得好有滿足感。」十多歲開始加入影壇，至今差不多有三十多年的豐富演戲經驗，想不到竟然到近幾年才是安安對演戲最有熱誠的開始。年輕時的她工作非常多，電影、電視劇、登台等等，令她從未細心享受演藝過程：「呢幾年出番嚟拍戲，每一部都係我喜歡、挑選過角色的電影。時間多咗，我先真正享受到演戲中嘅樂趣。」另一方面，母兼父職，她坦言同時擔任父親的角色也有點辛苦，她說：「以前兩個女仲細嘅時候，冇咗另一半去緩衝，始終有衝突，依家佢哋大個咗就明白事理。」除了工作上滿足之外，她也能驕傲地說：「我兩個女好聽話、好孝順。做完嘢返嚟，佢哋會錫吓我，問我攰唔攰，咁樣我已經好滿足。」

安安經常與友人分享其座右銘——「活在當下」。	余安安與周潤發。（黑白圖片）	余安安與李萬祺。（黑白圖片）

相信愛情獨欠緣分

雖然年紀不小，但安安樣貌、五官長得非常標致，更有點混血兒的感覺，無人不信她沒有男朋友，更曾有傳她與年紀相差22歲的男子拍拖。當重提緋聞時，她笑說：「可能大家太過緊張我嘅感情生活，想我快啲搵番個。我同邊個行埋一齊，就會話嗰個係我男朋友，不過我慣咗。」冇人追求就一定假，她坦言身邊有狂蜂浪蝶：「話我要求高又得，要求低又得，但緣分嘅嘢係好難。」雖然經歷過兩次婚姻失敗，但她仍然相信愛情，可是只是缺乏「緣分」：「唔會刻意去搵，呢啲真係要隨緣。有冇伴侶我唔在乎，只係家裏冇咗男人個角色。」續說：「係會有遺憾，但當啲女大咗，就冇咩緊要。」

安安笑言快樂由心開始。	余安安對品牌的香薰膏盒愛不釋手，成為她的極致珍藏品。	雪人、咖啡杯、還有小屋、花球……統統別致可愛。

活在當下

每人都有屬於自己的座右銘，安安經常與友人分享：「『活在當下』，依家呢個世代，好多人睇嘢負面，例如經濟唔好、落後國家多戰爭、多咗疾病，好多人年紀輕輕已經過咗身等……，When you still in live（當你仍生存時），好應該要去慢慢從細緻去享受、去欣賞。」

閨閣飄香

安安有收藏精緻擺設的習慣，尤其品牌Estee Lauder的香薰膏珍藏系列，每年年底品牌會推出限量的產品，並有不同的主題，十分獨特。原來她自2001年買了首個可愛香薰膏後，每年也有keep住買來作收藏：「雖然都幾貴，但又靚又香吸引到我。我覺得呢個擺設好unique，好多朋友上到我屋企見到都話靚，問係咩嚟，冇人估到香薰膏！呢個絕對係值得收藏嘅藝術品。」

採訪：馮雪怡

攝影：劉智源

服裝：Escada