朱晨麗「友」勇氣 誇過失戀

沈：好記得第一次認識Rebecca，喺拍電視劇《名媛望族》嘅時候，當時我哋經常喺化妝間撞到，我發覺你成日一個人坐喺度，好似好悶悶不樂咁，就主動搵你打招呼，想關心吓你，我好照顧啲靚女o架，哈哈！

朱：我都記得，之前參選港姐影海報，已經有人話我似你，之後睇到你嘅相片，咦？真係好似喎！之後，喺化妝間見到你，覺得你真人比上鏡仲靚，當時我係新人，你仲會主動同我講嘢，我覺得你好好人、好nice！

朱晨麗與沈卓盈情同姊妹，難怪連感情事也會分享。

朱晨麗鼻上有一粒癦，令她自覺不完美。

沈：之後我哋經常見到面，又喺化妝間傾偈，慢慢開始熟！初初覺得Rebecca有啲負能量，大家都係同事，好想你開心，亦知你無乜親人喺香港，所以好想畀啲愛同正能量你。

朱晨麗當選港姐冠軍，被評是名副其實的一屆。	朱晨麗初拍攝劇集《名媛望族》，獲多位好戲之人教路。	放大圖片

自我隔離「療傷」

朱：無錯，當時我真係唔開心，因為啱啱同男朋友散咗，初初拍劇時間唔穩定，又有啲緋聞出現，另一半唔能夠諒解就要有好多解釋，好難維繫，但分手都唔係呢個原因，而係因為我前男友要去第二個國家做嘢，大家商議好之後，決定分手，好聚好散！

沈：我都明嘅，分手當然會唔開心啦……

朱：所以拍《名媛》嗰陣，我經常一個人坐埋一邊唔出聲！當時，好彩你主動同我傾偈，關心我，我亦唔想將啲負面情緒放入去工作裏面，所以，我會同你傾偈，又或者坐埋一邊，諗辦法去調節自己。

一粒癦的感激

沈：忘記唔開心嘅嘢，我哋講啲開心嘢！

朱：好呀！我要繼續讚你，因為你教咗我好多嘢，好為我設想！拍劇我廣東話唔好，你叫我慢慢學，仲想介紹老師畀我；美容方面，你見到我身上有啲唔好嘅嘢，仲介紹醫生畀我！

沈：哈哈，你咁講，人哋會以為我介紹醫生畀你整容呀！

朱：唔係、唔係！係脫癦。因為我鼻上面有粒癦，遠睇好似鼻窿，想我完美啲，所以先介紹醫生畀我脫癦！

沈：大家都會好記得你係上屆港姐冠軍，今年你啱啱卸任，有無唔捨得？

朱：真係唔捨得，一年裏面好似做咗好多嘢，同埋「湊開」我嘅經理人又走咗，我都好掛住佢，我哋關係一直都好好，佢好似我媽咪一樣，所以依家都會keep住見面。

地下情定公開？

沈：講開又講，如果再拍拖，有個好鍾意嘅男朋友，你會選擇地下情定公開戀情呢？

朱：我會選擇唔公開！

沈：我都覺得唔公開對發展會好啲，因為太引人注目，好容易見光死，因為公開咗會受到好多方面嘅壓力，低調嘅做法，亦都因為我想大家將焦點放番落我嘅事業上面，適當時候好似決定結婚咁先去公開，我覺得咁樣會好啲。

朱：我都有同感，覺得唔公開，感情好似會Keep得耐啲。

沈：同你傾偈真係好開心，會同我盡訴心中情！希望你將來能夠開開心心，同我一齊將正能量帶畀身邊人啦。

採訪：影視組

攝影：吳文聰

場地：台灣一品花雕雞（銅鑼灣）