成龍散場獨白 爆從影心聲

成龍主演英皇電影新片《十二生肖》,不但是他的第101部電影,更險些成了他的「遺作」,大哥這次上高空、落火山,完成這齣「最後一部搏命動作片」,為自己的電影史寫下完美一章。

成龍不愧為健力士世界紀錄「表演最多特技的演員」(Most Stunts by a Living Actor),在英皇電影新片《十二生肖》中,他上飛三萬呎高空,下闖熔岩噴發的火山絕地,秉承歷年來的拚命精神,他說:「我好注重真實,盡量現場拍,除咗高空跳降傘,仲去咗火山實地取景,講真,我58歲啦!真係有諗過好唔好拍完呢部就退休?我唔想拍到有朝一日,啲觀眾望住個銀幕話『好心唔好再打啦』!喺火山拍戲嗰陣,啲工作人員叫我『大哥小心,啲熔岩噴出嚟啦』!我嗰刻喺度諗,如果啲岩漿噴埋嚟,我喺拍戲現場就咁死咗,件事幾靚,幾圓滿!但我自問呢套戲係我十年來最好作品,我又唔捨得死同退休!」

祖名幫手構思

成龍對新片貫注全副心血,他說:「我喺戲裏面放咗好多message,當年八國聯軍打中國,點解我安排戲中現代海盜裏面有唔同國籍嘅人?有句對白話『唔可以三、四個打一個』,我希望年輕人都可以睇得到。」此外,大哥續說:「散場時我有段心聲獨白,係出自房祖名意思,佢原本想將我歷年作品剪成MV,但我唔想太刻意,不過我真係覺得,我每個危險動作都有可能係最後一次,做完下半世可能坐輪椅,呢段獨白係發自內心。(找林鳳嬌客串,有否勾起她戲癮?)冇,佢本來就唔願意出鏡,七、八年前有洗頭水廣告出1,500萬元搵佢,佢都唔制,我哋合演只此一次,唔會再有機會。」

文:影視組

攝:謝國華

場地:Ozone @ Ritz Carlton