熊黛林心郁造人等生兔女
最近喜事多，吳彥祖名模太太Lisa S.和台灣名模林嘉綺宣布佗蛇女後，名模個個直言恨生女，更想夾啱生肖添！如「城嫂」熊黛林就瞄準生「兔女」，新婚燕爾的周汶錡則想生個「豬女」。
熊黛林
「我想生女仔，因為嗲啲，我鍾意人成日黐住我。生肖嘅話最好就屬兔，因為比較溫馴啲。」
汪圓圓
「都係想生女，因為我同家姐同媽咪關係好好，好似朋友咁，其實最想生2男2女，咁就有齊兄弟姐妹。最想生屬雞嘅，媽咪同家姐都係屬雞，好欣賞佢哋，又靚女又叻女。」
陳嘉容
「我揀兔仔，因為兔仔好可愛同單純，其實生兔女都得，最好生龍鳳胎，一次過搞掂，都好想快啲搵到另一半，而佢又好鍾意小朋友，咁就會生。」
黃榕
「我想生龍仔，我鍾意仔因為男仔曳又活潑，我唔鍾意悶，加上女仔易畀人呃，男仔學壞少少冇所謂，只要唔做壞事就得。」
黃心穎
「我鍾意老鼠仔，因為爸爸屬鼠，同我好夾，我想生幾個小朋友，第一個想生仔，仔可以保護細佬妹，同埋想佢哋學冰上曲棍球，又想佢做運動員。」
朱千雪
「我鍾意生龍仔，因為自己都係屬龍，同埋生仔唔使擔心，父母對女仔又擔心啲，仔感覺上易教啲，大個咗又可以保護媽咪。」
郭穎兒
「我最想生孖仔，真係好鍾意仔，無論點我都一定要追到仔為止！因為我覺得仔可以保謢到我。生肖方面，覺得自己同豬夾。」
鍾采羲
「我想生一仔一女，最好係兄妹，生肖屬蛇同鼠，所謂蛇鼠一窩吖嘛！因為自己屬兔，好溫馴，成日都畀人蝦，所以想自己嘅仔女係一啲叻啲嘅生肖。」