G.E.M.唔夠溫柔拒接床戲

歌手G.E.M.(鄧紫棋)首次應邀為迪士尼全新動畫《無敵破壞王》配音,她大讚角色猶如為自己度身訂造一樣,聲演起來零舍得心應手,第一次配音的她更自言有天分。G.E.M.亦自爆個人死穴是扮溫柔,更要求公司唔好為她接床戲同咀戲。

G.E.M.(鄧紫棋)首次為迪士尼全新動畫《無敵破壞王》配音,她表示故事中的主角「雲妮露」猶如為她度身訂造一樣的絕配,她說︰「個主角同我本身性格極之相似,一樣都好多嘢講,一開聲就一輪嘴停唔到,同埋佢係一個好爽朗、堅強嘅人,我諗呢個都係佢哋搵我配音嘅原因。」對於第一次配音,G.E.M.充滿信心︰「配音時有專業配音員喺現場指導,成個過程非常順利,原本預兩日去配,但第二日仲有得早收工,我覺得自己都幾有天分。」

提男友怕醜

這次配音G.E.M.更有機會與影帝黃秋生合作,她表示難敵對方的搞笑本領︰「佢要用把好MAN嘅聲去講好卡通嘅對白,我聽到之後忍唔到笑。」G.E.M.認為這次配音是一個很好玩的經歷,同時亦慶幸自己不用扮溫柔,她說:「雖然個角色係一個公主,但好彩佢同傳統嘅公主唔同,因為要我扮溫柔係最困難嘅事,曾經有一部台灣得獎電影搵我試鏡,我一試完就知自己冇希望,因為我真係做唔到好柔弱嗰種性格。」問到是否只有對住男友才有斯文一面?G.E.M.聞言馬上變得非常怕醜,大叫「唔知道」。

談到她甚少接拍電影,原來她對演戲有恐懼︰「其實我好驚拍戲,對喜劇會有信心啲,但我都要求公司唔好接咁多電影嘢,尤其係唔好接床戲同咀戲。」最後問到會否叫男友捧場?她笑說︰「總之係朋友就自動自覺幫吓手買飛入場睇。」

文︰影視組