HotCha 抓Regen歸隊 提升吸金力
女子組合HotCha二缺一好一段日子，據聞成員Regen有意明年歸隊，拍檔Winkie亦有所聽聞，但一切交由唱片公司決定，不過，兩女坦言希望Regen回歸，因HotCha三位一體的感覺太深入民心，Regen的「暫別」令組合工作量大減，吸金力下降。
日前HotCha、陳僖儀（Sita）、雨僑、裕美、小肥等齊出席防火宣傳活動，問到HotCha成員Winkie隊友Regen出外升學逾年何時返港？她說：「都有同Regen通電話，我有叫佢返嚟，佢都有意思歸隊，希望明年年頭可以成事，不過一切都未落實。」Winkie自言雖然在Regen離開後，跟另一成員Crystal依舊有機會出碟，甚至「單飛」發展嘗試拍劇、參與舞台劇及出書等，但不諱言工作有受影響：「HotCha係三個女仔太深入民心，冇咗一個，梗係少咗樣嘢咁，工作量冇以前咁多，所以我好想好想Regen返嚟！」
小喇叭撐Big Bang
Winkie自言是韓國人氣組合Big Bang的超級Fans，就算演唱會門票要1680元也不覺肉赤搶住撲飛：「我好辛苦先透過朋友撲到飛咋，搵咗好姊妹Sherman（鍾舒漫）陪我一齊睇。」她又表示看騷時帶了小喇叭到場，跟Big Bang大聲喝采。
同場的Sita表示近期風高物燥易生火警，故呼籲行山及到郊野公園燒烤的人士要小心火種，她又說小時候很乖不會玩火，每逢中秋節看見小朋友玩煲蠟時，一定會上前阻止：「煲蠟除咗會整污糟地方，仲好危險，小朋友真係唔好亂玩。」
文：音樂組