阮民安深夜蒲頭 唔認被追數
前組合E-Kids成員阮民安（Tommy）早前以取巧手段，售賣韓國人氣組合Big Bang香港演唱會的門票，更被一批歌迷上門追數，但他卻潛水玩失蹤。前晚深夜本報發現涉嫌走數的Tommy悠閒拖女行街，對被指欠債一於少理。
早前韓國組合Big Bang在亞洲博覽館開騷，三場演唱會一票難求。前組合E-Kids成員Tommy聲稱有途徑可以取得門票，最後被踢爆取巧以票尾扮門票，令向他買門票的歌迷不得其門而入。在第二場演唱會，更有歌迷報警求助。雖然Tommy當場向歌迷退回門票錢及賠償車馬費，但據知有另一批歌迷未有收到賠償，更湧到Tommy於旺角租用的寫字樓追數！豈料當事人卻一直龜縮潛水，恍似人間蒸發。
兜兜風四圍貢
前晚11時許，本報發現失蹤多日的Tommy，以及他力捧o靚模Eva在尖沙咀行街。只見戴口罩的Tommy低調地和Eva在DVD店內「四圍貢」，不過似乎未有心水。未幾，空手而回的兩人離開DVD店，漫遊彌敦道轉戰一個快將關門的商場。記者上前問及近日涉嫌詐騙事件，Tommy聞言例牌否認：「呢件事已經解決咗，都冇人上過我office追數。」
Tommy自2002年出道後負面新聞一籮籮，2006年在澳門賭場向「疊碼仔」借貴利，遭2名大漢押返港並追數24萬元；2011年又有傳他向財務公司借10萬元未還，更想把債務轉交好友林雪，事後他卻自稱無財務問題，連他前老闆陳百祥（阿叻）亦批評他品格有問題。
文：音樂組