6號喊足3次鼻涕長流

樂隊RubberBand前晚舉行處男紅館個唱《RubberBand Easy Concert2012》，一向走實力派路線的四子獲多位圈中人捧場，包括樂隊Mr.、黃偉文、小肥等人。主唱6號講明只玩音樂不賣Gimmick，全晚沒有換衫位唱足3個鐘，又演奏多種樂器騷才華。當嘉賓杜德偉（Alex）出場跟他們合唱《擦身情緣》時更是尖叫聲不斷，令Alex不禁笑言：「我要多謝佢哋畀我再次感受到少女嘅尖叫聲！」

容祖兒搶杜德偉

Encore時，另一神秘嘉賓容祖兒終於現身，甫出場便講笑：「畀番個杜德偉我啊！」自稱小fans的她又大讚6號：「佢唱歌好用心，每次見到佢唱到口水都飛晒出嚟我就覺得好感動！」送走了祖兒，6號開始朗讀水蛇春咁長的感謝名單，一向眼淺的他再度泣不成聲，更喊到流鼻涕！他感性地說：「今年過得唔容易，好多事發生，阿正都一樣好多嘢要煩，希望大家畀多啲正能量佢！多謝大家支持我哋呢個唔注重包裝，淨係鍾意玩音樂嘅樂隊！」令在場不少歌迷都偷偷流下眼淚。

主音6號成晚喊足三次，別人為他遞上紙巾多啲嚟密啲手，更直接用手抹鼻涕。	6號	祖兒同RubberBand合唱擦出火花。

金牌三百萬挽留

慶功宴上追問6號有何辛酸事，他說：「做呢個騷好困難，第一次做咁大型有好多壓力，亦都有啲遺憾可以再做好啲。」而有傳其公司金牌大風大地震，鼓手泥鯭表示他們已約滿：「騷前真係太忙冇時間諗，有其他公司搵過我哋，交晒畀Mark（雷頌德）處理。（有傳以300萬留你哋？）錢係會有影響，但最重要係互信同創作空間，我哋想去更遠嘅地方。」而金牌大風昨日亦發出聲明，兩名高層包括行政總裁李文偉和音樂推廣總經理朱浩棠已向公司請辭，但澄清人事變動屬正常情況，並不會影響公司運作。

文：音樂組