阿倫撐志偉：佛都有火
曾志偉捲入黃浩被掌摑事件，好友陳百祥出席籌款活動時笑言，早知叫「佢」嚟夾廿萬摑兩巴籌款。而他與譚詠麟分別表示覺得被掌摑的是曾志偉本人。
陳百祥（阿叻）出席《歡樂滿東華》節目時，指事發當晚大家可能喝醉，覺得被掌摑的其實是曾志偉，阿叻笑說：「志偉咁純嘅小羔羊，通常喝醉畀人揼係由我去報警。金剛畀人打十幾巴、劉松仁打王浩……信十三巴，又冇人報警。無論姓王（黃）浩都畀人冚？志偉鵪鶉咁嘅，又唔敢答。多數係佢打志偉，會唔會呀？我當時唔喺現場，大家講吓咪算囉，小事化無，開開心心。」叻哥又靈機一觸笑說：「吖，早知頭先叫嗰個嚟，我哋一人捐一萬一巴，摑王浩信都籌到十三萬啦。整二十萬出嚟，我同志偉一人十萬，整兩巴搞掂啦。一萬一巴做慈善問佢制唔制，呼籲佢入嚟。」記者問他所指的「佢」，是指黃浩還是王浩信，他再笑說：「我唔知佢叫乜名，又我唔識佢。我以為你哋講緊王浩信咋。」此外，對於家中被爆格，他笑言要養老虎看門口，他說：「被偷咗十幾萬現金券，打咗去馬會，如果有人拎錢就拉到。」
有坐低商討事件
而志偉與好友譚詠麟（阿倫）昨現身馬場，對志偉近日的新聞阿倫表示有四點要講，他說：「A，我印象中志偉嘅角色唔係咁。佢應該係畀人打，唔係打人。唔通依家逆轉咗潮流？B，志偉之前皈依我佛，法號覺悟。如果郁手打人係咪即係佛都有火呢？C，可能佢唱緊張學友首《輕撫你的臉》，表達細佬唔好搞咁多嘢。D，佢兩個都好多事要處理，畀啲空間佢哋。」阿倫更作狀「輕撫」與一齊入場的彭健新。其後阿倫一見到志偉，當眾作狀摑他三巴。
志偉昨則表示「食屎狗」言論後未有收到電話。前晚他於籌款活動中被問到事件中演藝人協會有否作出行動，他承認有坐低過商討事件：「但冇行動，因為佢哋未有要求我哋幫助呢件事，除非有演藝人要求，否則我哋不會主動的，亦不會作出回應。」
陳奕迅返港封嘴
另外，陳奕迅昨日在陳家瑛及兩名助手陪同下返港，現場有四保安護駕，神情輕鬆的他被問到有關曾志偉「食屎狗」言論，他只搖一搖頭。再追問到黃浩反口指沒有看過短片？他顯得不耐煩，並點頭示意不再多作評論。問到囡囡心情、志偉表示曾與他聯絡、以及經理人陳家瑛到警署提供資料等問題，他都沒有回答。期間他又模仿記者倒後行，並說：「辛苦晒」。
文：影視組