毛毛做服指老公變阿四

臨近聖誕節,毛舜筠(毛毛)日前抽空與老公區丁平及兩名女兒到中環shopping享受家庭樂,女兒往睇衫時,毛毛則在旁做形象指導,而身為一家之主的區生就做「阿四」為老婆及女兒拿取戰利品,一家四口相處融洽。

現年53歲的毛舜筠,自95年下嫁電影導演兼美術指導老公區丁平後,先後誕下兩名女兒,分別是17歲大女區令山和11歲的區亦山。近年主要拍電影及代言產品工作的毛毛,趁着聖誕節前,特地抽空陪家人外出行街買禮物兼享受家庭樂。

大女高過媽咪

日前下午5時許,毛毛一家四口現身中環連卡佛,未知是否準備聖誕假期舉家出埠旅行,見他們在挑選高級行李篋,毛毛對一個價值八千多元的旅行箱情有獨鍾,自行取出來又拉又推,睇得相當認真,但研究完一輪卻沒有幫襯。之後毛毛帶囡囡到女裝部睇衫,其大女令山長得亭亭玉立,近年已高過媽咪,細女就十分黐身,當囡囡揀衫時,毛毛則變身服裝指導給予意見,而區生就如保鏢般全程陪伴左右。

盡顯體貼一面

其後他們又往睇太陽眼鏡及飾物,逗留約1小時便購下心頭好,身為一家之主的區生自動波為「三女」拿取戰利品,盡顯體貼一面。之後毛毛手持單據往下層攤位排隊換取禮品,期間有途人認出她眼望望,但她一於少理,繼續跟老公及女兒傾偈,大晒幸福。

文、攝:追蹤組