周柏豪mark實筍盤 投資金磚

柏豪為來緊12月28至30日一連3場的《周柏豪PAKHO IMPERFECT LIVE 2012》演唱會舉行記招，在台上宣布預訂門票火速售罄，除了演唱會成績報捷外，柏豪更獲唱片公司送上重量級大禮，即場獲高層和他進行續約儀式，更派出金髮索女送上香吻和金蛋，寓意他繼續幫公司賺大錢，認真人財兩旺！

談到續約原因，柏豪笑言公司就好似筍盤一樣，好東西一定要mark實，他說：「今次同公司續約三年以上，之前一直合作幾好，就好似住屋咁，住開一間風水好嘅屋冇理由搬屋啫。（續約金額幾多位數？）再講幾位數就『娘』啦，總之條件好好。」柏豪更透露公司計劃為他搞紅館騷，目標兩年內實現。他又否認續約後豬籠入水，故未有買禮物獎勵自己，不過近日就買了金磚保值。

柏豪即場揮筆，同創演唱會高峰。

除了香吻，美女還送上金蛋予柏豪。

嘉賓保密 營造驚喜

另外，柏豪透露公司至今對演唱會嘉賓守口如瓶，務求為他製造最大驚喜，但他笑言希望每場都有不同嘉賓，這樣會更神秘和好玩。他又自爆已經操定「六舊朱古力」並準備好戰衣，到時保證歌迷可以大飽眼福。

文：音樂組