許亦妮:唔覺佢好呢味嘢

2010年國際中華小姐季軍張慧雯(Candy)與一名姓羅的男子前晚凌晨在落馬洲因涉嫌藏毒被捕,曾與Candy合作過的藝人獲悉事件後都大表驚訝,不過眾人力撐Candy是乖乖女,希望她大步檻過。

黃浩然︰「好突然,雖然我只見過佢兩次,傾唔夠十句,不過佢幾有禮貌,喺我印象入面佢係一個乖乖女。當然希望佢冇事,始終係同事。(近期多藝人吸毒?)唔覺得淨係呢排特別多,不嬲都有。(引誘你?)未試過,我身邊人都知我係咩人,引誘我都冇用。」

麥長青︰「嘩,拍戲咋?咁似拍戲啲劇情。(震驚?)我都呆一呆、醒一醒,雖然我同佢唔熟,不過覺得佢好開朗活潑。其實藝人係公眾人物,應該時刻都要警惕自己,我自己兒童節目出身,連煙都唔食,酒都少飲,以身作則。」

許亦妮︰「吓,有啲咁嘅事?我之前出騷都見過佢,唔覺得佢好『呢味嘢』,可能同佢認識唔深,不過喺我心中佢係一個好sweet、幾乖嘅女仔,我唔覺得係真,會唔會係個男仔食咋?希望係誤會。(聽聞圈中人吸毒?)實有,一定有人好『呢味嘢』,不過只係傳聞,唔知係咪真。」

黃翠如︰「唔係呀嘛?!我只見過佢一次,覺得佢好靚、好迷人,希望件事係誤會。(呢排有好多藝人吸毒嘅傳聞?)我成日覺得呢啲係傳聞,我自己連夜生活都冇,過嘅係阿婆生活。」

馬國明:「拍劇成日見,但私下冇聯絡,亦都冇見過佢接觸呢啲嘢,我覺得佢係傻更更,幾可愛嘅女仔,可能當中有誤會。」

黃智雯:「都幾驚訝!不過我唔太了解件事,唔係好方便去評論。(打畀佢?)呢段時間都唔想打擾佢啦!」

佘詩曼:「呢件事好難回應,都係交番畀警方處理好啲。(娛圈引誘多?)對我嚟講冇喎,我拍劇咁忙,又瘦成咁,再有人搞(引誘吸毒)會死O架。」