黎明擁抱曼玉 雨水降溫
天王黎明（Leon）及影后張曼玉（Maggie）昨早出席「聯合國兒童基金會慈善跑」活動，曾合作的二人甫見面即擁抱及傾偈。活動期間不停落雨，但無損Leon大好心情，並妙語連珠講大細雨的感覺，又自爆愛落雨跑步，貪雨水有降溫作用。
天王Leon及影后Maggie昔日曾合作經典電影《甜蜜蜜》及《一見鍾情》，昨日兩人在活動上甫見面即興奮送抱，並不停密密斟，有講有笑，隨後一同主持三公里賽（親子組）起步儀式，吸引不少參賽者狂拍照，有份落場的中國著名女子排球運動員趙蕊蕊，因個子極高，拍埋其他參賽者身邊相映成趣。席間問到Leon與Maggie是否久未見面？他們說：「係呀，好多年，但有時喺北京、上海都會撞到，但計呢類活動就應該3年左右。」因Leon要頒獎，未能相約飲茶，但Maggie表示會再與Leon慢慢傾。
妙語論盡大細雨
Maggie於台上分享雲南探訪愛滋病患者的經歷：「睇到佢哋嘅生活，聽到佢哋嘅故事，係個人寶貴嘅經歷。」她並呼籲大家不要歧視愛滋病患者。
活動期間頻頻下雨，Leon妙語連珠：「上天安排落雨，下年參加就會記得今年，大雨同細雨有唔同感覺，可以抗衡自己體能，面對挑戰，唔係太大雨比曬太陽跑好，因為身體會熱，落雨有冷卻作用，我自己揀落雨跑，太陽留番沙灘曬！」Maggie與Leon雖然難得碰頭，可惜二人均不願在活動後接受訪問。
同場有歌手江若琳（Elanne）、鄭融、HotCha等參加慈善跑。首次參加的江若琳籌得4位數字善款，又自爆和朋友打賭，如未能跑畢全程就要請食飯。
文：音樂組