黃智雯心無雜念 星途打拚

藝訓出身 曾選港姐

相信唔係好多人記得我係選港姐入行，記得嗰時自己冇咩勇氣，係媽咪叫我選，我一啲都唔熱衷，又驚當時男友唔鍾意，點知最後係佢鼓勵我參加，但喺選嘅過程入面心態好矛盾，首先自問唔係風頭人物，只係focus自己練習，我係傻到會諗唔好畀我贏，因為驚贏咗就要放棄感情，根本唔知娛樂圈係點，係咪唔可以拍拖呢？直到剩番一星期就總決賽，大家開始估邊啲係熱門，我都叫做係黑馬，可能嗰年好多舞蹈環節，本身有跳舞底，會比其他人pick up快啲，咁就多咗自信，直至當晚五強選三甲，喺宣布冠軍嗰刻，我不停同自己講，千祈唔好係我，最後得獎者係張嘉兒，我覺得係實至名歸，因為佢EQ好高。

落選感失落

完咗比賽之後我入咗訓練班，但開始好失落，見到當選幾個女仔扮到好靚去做親善，去見識，原來嗰種感覺係會好羨慕，自己就由零開始，會諗，如果攞咗獎嘅話可能會快啲得到知名度，喺個圈條路會好行啲，好在呢個心態好快調節到，冇幾耐公司亦安排我入劇組，正式展開演員生涯。

黃智雯希望接演更多不同類型的角色。	黃智雯為專心發展事業，忍痛與男友分手。	黃智雯於2007年參選港姐，亦打入五強。

重新選擇決定一樣

與此同時，工作時間開始日夜顛倒，同男友見面唔多，以前我係會用大半時間陪佢，但拍劇時間根本唔穩定，我唔可以丟低工作去玩，慢慢大家就有摩擦，加上家庭背景唔同，問題愈趨嚴重，雖然挽救過，但始終唔work，心諗一係唔做嘅啫！好矛盾，拖拉咗一段時間，我知道事業愛情唔可以共存，所以我做咗一個沉重決定，就係捨棄咗4年嘅感情，將重心放喺事業，係殘忍，但其實我冇得揀！

冇拖拍嘅日子，我反而覺得如釋重負，可以更加專心工作，冇咁多牽掛，拍親熱鏡頭又唔驚對方唔開心，冇雜念可以更加專注角色，所以就算今日再畀我揀，我都會毫不猶豫揀事業，我並唔係冷血，只不過覺得既然選擇演員呢條路，就應該全情投入，唔會畀其他嘢影響到，我享受工作帶畀我嗰分滿足感，所以犧牲兒女私情，我絕對無怨言，因為感情係雙方一齊去經營，互相配合，而唔係埋怨！

捧獎有信心

呢幾年我覺得自己都幾好彩，遇到好多角色有發揮機會，好似鵪鶉妹、關二嫂、美雪……到早前嘅泥水妹，對觀眾嚟講都有唔同感覺，見到大家討論，無論批評或者讚賞，對我嚟講都係一個意見，最近被吹捧係今年「飛躍進步女藝員」大熱，受人讚賞當然開心，因為獎對藝人嚟講好緊要，係一個肯定，當然想攞啦！但都知道要有其他因素配合，不過對我嚟講，今年比往年信心大！

多謝潘嘉德捧起鵪鶉妹

唔經唔覺都入咗行5年，計計埋埋拍過好多套劇，雖然唔係第一女主角，但好多監製都好錫我，畀好多機會我發揮，好似潘嘉德，佢絕對係我伯樂，因為係佢搵我拍《搜下留情》，發掘咗鵪鶉妹，令觀眾開始留意我，後來我哋都keep住有合作，好似《On Call 36小時》、《巴不得媽媽》都係有發揮嘅角色，工作以外，我哋都會有定期聚會，大家關係亦師亦友，當遇到咩難題都會問佢意見。

採訪：影視組　

攝影：沈健程　

髮型：Warden Luk @ IL Colpo