周柏豪作歌向婆婆致敬
周柏豪下月底於九展開騷，他率先預告自彈自唱是個唱必備部分，而最近勤於操肌的他，亦直言已預備屆時會大騷肌肉，但對於跳舞他就堅決Say No！而一向愛錫婆婆的柏豪亦透露，個唱會特別送歌給已去世的婆婆，向婆婆致敬！
周柏豪將於下月28至30日假九展舉行一連三場《周柏豪PAKHO IMPERFECT LIVE 2012》演唱會，問到最近努力操肌肉的柏豪屆時可會慷慨騷肌？他說：「操得嚟都預備咗！（9成會騷？）係，睇吓滿唔滿意啦，滿意就騷晒上半身，唔滿意就睇吓騷邊個部分，自己滿意就OK！」但原來騷肌對柏豪而言亦是一個大突破：「因為啲人覺得我好瘦、好弱，但真係唔係大家諗嘅咁！」
跳舞耍手擰頭
不過，問到柏豪會否挑戰跳舞？他即耍手擰頭說：「唔喇，我唔係跳舞材料，唔會特別舂個頭埋去，要我跳舞就好似要我講笑話咁，一樣咁大鑊！我講笑話啲人唔笑o架，梗係唔會！（跳騎馬舞？）唔好搞喇，連嗰個都跳得唔好畀人笑，做好自己嘅強項。」雖然柏豪決絕表示不會跳舞，但他承諾定會施展渾身解數滿足歌迷，而自彈自唱亦是必備的部分。
溫馨片段重溫
提到柏豪與婆婆感情要好，但婆婆於今年離世，問到柏豪會否因婆婆未能欣賞其個唱而感遺憾？他說：「冇，上次我1月開騷婆婆都有睇，佢仲坐第一行！」柏豪又透露個唱上會特別送歌給婆婆：「導演都有問我拎相，到時個Video Wall都會有我同婆婆嘅回憶，叫做向佢致一個敬，敬一個禮！因為佢湊大我，細個同佢經歷咗好多嘢，同佢感情最好。（唱佢鍾意嘅歌？）我唔知佢鍾意咩歌，就算佢喺醫院嗰時，都係播我啱啱出道嘅歌，係我頭號歌迷！」
文：音樂組
Hair：Cliff Chan@ Hair Corner
Make Up：Kris Wong